1 Хомустаахха олунньу 7 күнүгэр тэрилтэ үлэһиттэрэ дуобакка күрэхтэспиттэр. Ол курдук, нэһилиэк тэрилтэлэриттэн 8 хамаанда турбутун спортинструктор Семен Охлопков этэр.
“Дуобакка 40 кыттааччы күрэхтэстэ. Быйыл улууска оҕо спордугар улахан болҕомто ууруллан, бары нэһилиэктэр күүстээх үлэ ыытыллара күүтүллэр. Нэһилиэкпит иһигэр оҕолорбутугар уонна улахан дьоҥҥо күрэхтэһиилэри тэрийэн бастыҥнары сүүмэрдиэхпит. Онтон салгыы улуус таһымыгар күрэхтэһиэхтэрэ. Барыта маннык бэрээдэгинэн барыахтаах”, – диир Семен Михайлович.
Улууска оҕо спорда биллэриллибитинэн үгүс нэһилиэктэр ыытыллар спорт тэрээһиннэригэр оҕолору күрэхтэһиннэрэр буоллулар. Оҕо үгүс күрэхтэһиилэргэ кыттыыны ыллаҕына эрэ сайдыаҕа. Бу сылга оскуола үөрэнээччилэрэ төһө кыалларынан, улахан дьону кытта тэҥҥэ күрэхтэһиэхтэрэ.
Харысхан Попов