Бэҕэһээ, ыам ыйын 5 күнүгэр, 1 Хомустаах «Алгыс» норуот айымньытын киинигэр сылын аайы ыытыллар З.П. Винокуров аатынан Намнааҕы оҕо искусствотын оскуолатын 1 Хомустаахтааҕы филиалын үлэтин отчуоттуур дьоро киэһэтэ буолан ааста. Бу күн саала киэҥ истиэнэтигэр араас тематикалаах уруһуй кылааһын үөрэнээччилэрин быыстапката турда. Оҕолору уруһуй киэҥ эйгэтигэр Юлия Иванова, Туйаара Бережнева уонна Нария Романова үөрэтэллэр.
Оскуолаҕа 137 оҕо искусство алта көрүҥэр уһуйуллар — фольклор, фортепиано, домра, ырыа, үҥкүү уонна уруһуй. Преподователлэр икки үөрэх программатынан үөрэтэллэр, сэбиэдиссэйинэй Туйара Бережнева үлэлиир.
Кэнсиэргэ оҕолор сыл устата туохха үөрэммиттэрин, сатыыр сатабылларын көрдөрдүлэр. Үөрэнээччилэр араас таһымнаах улуустааҕы, республикатааҕы, Бүтүн Россиятааҕы 60 быыстапкаҕа, 75 конкурс-фестивалларга миэстэлэспиттэр.
Эдэр преподователь Виктория Корякина домра кылааһыгар 8 үөрэнээччилээх, кинилэр искусство бу көрүҥүнэн сөбүлээн дьарыктаналлар. Быйылгы үөрэх дьылыгар фортепиано кылааһыгар выпускниктар Охлопкова Амелия, Дальбинов Коля учууталлара Наталия Обутова үөрэҕин чиҥник ылынныбыт диэн махталларын тиэртилэр.
Фольклор кылааһын үөрэнээччилэрэ — Чаҕыл» фольклорнай бөлөх, салайааччы эдэр специалист Урсун Винокуров, музыкальнай инструменнарга оонньоон дьон биһирэбилин ыллылар. Үҥкүү кылааһын үөрэнээччилэрэ «Күнчээн» ансаамбылга сөбүлээн, дьарыгы көтүппэккэ сылдьаллар, салайааччы СӨ культуратын туйгуна Туяра Мохова уонна эдэр специалист Сардана Березкина. «Туллуктар» ырыа ансамбыла ылбаҕай ырыаларынан ыллаан дьиэрэттилэр, салайааччы Наталия Обутова.
Бу үөрэх сылын түмүгүнэн бастыҥ үлэһиттэр наҕараадалары туттулар. Ол иһигэр оҕолор кэнсиэртиир таҥастарын тикпит, бэлэмнээбит костюмер идэлээх иистэнньэҥ Айталина Охлопкова үтүө суобастаах үлэтин иһин бэлиэтэннэ. Оҕо искусствотын оскуолатын үөрэнээччилэрин кэнсиэрэ ытыс дохсун тыаһыгар доҕоһуолланан үрдүк таһымнаахтык ааста.
Лена Корякина