Бүгүн «Нам улууһа» МТ 2023 сыллааҕы үлэтин отчуоттуур улуус баһылыгын э.т. Анатолий Павлов салайааччылаах 1-кы бөлөх, күн иккис аҥарыгар 1-кы Хомустаахха отчуоттаата, нэһилиэнньэ ыйытыыларыгар хоруйдаатылар, этиилэри ылыннылар.
Итиэннэ, улуус депутаттарын сэбиэтин ааспыт сыллааҕы үлэтин председатель Алексей Винокуров сырдатта. Отчуот кэнниттэн Анатолий Иванович ааспыт сыллааҕы боротокуолга киирбит туруорсуулар төһөтө туолбутун, туох кыайтарбатаҕын иһитиннэрдэ.
Нэһилиэк депутаттарын председателэ Юрий Николаев уулуссаны сырдатыыга туттуллар остуолба арендатын улуус дьаһалтатын кытары бииргэ үлэлэһэн көтүрэргэ туруоруста. «Улууска Оҕо спордун сыла биллэриллэн сыллааҕы былаан торумнанна дуо?», — диэн ыйытта. Хайыһар көрүҥүн күүскэ сайыннарыыны туруоруста.
Олохтоох автобус маршрутун сөргүтэри, почта отделениетыгар начальник туруорсаллар. «Уматык сыаната үрдүү турар буоллаҕына тыа хаһаайыстыбатын үлэтэ-хамнаһа оннуттан өнүйбэккэ, кэхтиигэ да барыан сөптөөх», — диэн аҕам саастаах киһи санаатын үллэһиннэ.
Нэһилиэк дьаһалталарын специалистара уопсайа 21 анал программаларга, платформаларга үлэлииллэринэн сибээстээн, специалистары түмэн үөрэтэр, ыйар-кэрдэр семинардары, үөрэхтэри ыыталларын, өрөспүүбүлүкэтээҕи суолталаах суол сырдатыыны көрүүнү-истиини уонна төлөбүрүн тустаах тэрилтэ, управление, министерство ылынарыгар туруорустулар.
Сынньалаҥ киин кырыыһатынан тэстэрин өрөмүөннээн туоратарга культура уонна духуобунай сайдыы управлениета күүс-көмө буолара буоллар, бэйэбит күүспүтүнэн нэһилиэк музейын тэрийиэ этибит дииллэр.
Бүгүҥҥү отчуокка Нам улууһуттан Ил Түмэҥҥэ депутаппыт Александр Атласов кыттыыны ылан, нэһилиэнньэ ыйытыытыгар өссө дириҥник быһааран биэрдэ.
1-кы Хомустаах олохтоохторо «Нам улууһа» МТ дьаһалтатын ааспыт 2023 сыллааҕы үлэтин биһирииллэрин биллэрдилэр.
Семен Аргунов