Нам сэлиэнньэтин 17 тыыл бэтэрээнигэр “Улуу Кыайыы 80 сыла 1941-45 сс.” юбилейнай мэтээллэри туттардылар.
Ленскэй нэһилиэк баһылыга Петр Сокольников бу күннэргэ сэлиэнньэбит сэрии сылларыгар тыылга үлэлээбит Ытык кырдьаҕастарга юбилейнай мэтээллэри туттартаата. Баһылык Петр Григорьевич араас ыарахан үлэни санныларыгар сүкпүт, эт илиилэринэн хара үлэни билбит тыыл ветераннарын кытта кэпсэттэ, санааларын иһиттэ.
“Оҕо саастарын үлэҕэ анаабыт ытыктабыллаах кырдьаҕас дьоммутугар юбилейнай мэтээллэри туттардыбыт. Хас биирдии тыыл ветерана уһун, судургута суох суоллаах. Эппиэтинэстээх, сүрэхтээх буоланнар, сэрии ыар сылларын аһарбыттара, олоххо дьулуурдаах, тардыһыылаах буоланнар, күнтэн-күн кынаттаналлар диэн киэн тутта ааттыыбыт”, – диир Петр Григорьевич.
Харысхан Попов