Нам улууһун 2 Хомустаах нэһилиэгэр саҥа врачебнай амбулатория үлэҕэ киириитин үөрүүлээхтик бэлиэтээтилэр.
Олохтоохтору, ыалдьыттары улуус баһылыга Юрий Слепцов, СӨ доруобуйа харыстабылын министрин 1 солбуйааччы Дмитрий Сергин, кылаабынай быраас Ариан Сергеев уо.д.а. эҕэрдэлээтилэр. Наҕараадалары, сэмэй бэлэхтэри туттардылар.
Бу тутуу «Доруобуйа харыстабыла» национальнай бырайыак чэрчитинэн «2021-2025 сс. доруобуйа харыстабылын бастакы сүһүөх звенотун модернизациялааһын» региональнай программа иһинэн ыытылынна.
Модульнай амбулатория аныгы ирдэбилгэ толору эппиэттиир гына толору хааччыллыылаах, аптечнай пууннаах, үс куойкалаах күнүскү стационардаах. Коллектив үлэлииригэр, нэһилиэнньэ көрдөрүнэригэр усулуобуйа лаппа тупсубут.
Врачебнай амбулаторияны «Основа» ХЭТ тутта. 2 Хомустаах нэһилиэгин олохтоохторо доруобуйаларын көрдөрүнэллэригэр бары усулуобуйа баар буолбут. Бу барыта — судаарыстыба өттүттэн болҕомто бэлиэтэ уонна сайдыы көстүүтэ.
Касьян Олесов-Олук