Нам улууһугар СӨ Правительствотын отчуота салҕанар. Иккис бөлөҕү СӨ норуоттарын дьыалаларыгар уонна тас дойдулары кытта сибээстэһиигэ миниистирэ Гаврил Кириллин салайар.
2023 сыл Россияҕа Педагог уонна Сүбэһит, Саха сиригэр Үлэ сылларыгар тустаах үлэһиттэргэ болҕомто ууруллубута.
Президент Владимир Путин олоххо киллэрбит Национальнай бырайыактар программата Саха сиригэр күүскэ үлэлээн үгүс тутуулар бардылар. Холобура, доруобуйа эйгэтигэр Намҥа кырдьаҕастар уонна инбэлииттэр дьиэлэрэ киирбитэ. Дьон олоҕо чэпчииригэр, олорор саас уһууругар саҥаттан саҥа, бары өттүнэн эппиэттиир поликлиникалар, тутуулар олоххо киирэллэр.
2 Хомустаахха интернат тутуута көтөҕүллэр. Тыа хаһаайыстыбатыгар кэлин нэһилиэнньэ ыйытыы биэрбэт буолбута дьиксиннэрэр. 2 хомустаахтар көмө көрдүүллэр. Холобура, эдэрдэри тыа хаһаайыстыбатыгар сыһыардахха, үлэ тахсыылаах буолара өйдөнөр. Ынах-сүөһү иитиигэ, кооперативтары тэрийии өттүгэр сүбэлэр этиллэллэр.
Саха сирин үгүс улууһа өртөөһүнү туруорсубута балачча кэм ааста. Өртөөһүн салаатыгар научнай үлэлэр ыытылла туралларын чопчулууллар. Ол үлэ билигин да салҕанар.
Быраас суоҕа бу да сырыыга этилиннэ. Кадрдарынан хааччыллыы Саха сиригэр Арктика өттүгэр мөлтөһүөр. Ол да иһин араас ньымалар толкуйданаллара этиллэр. Улуустарынан быраастар дьон доруобуйатын көрө айанныыллара, толкуйдаммыт ньымалартан биирдэстэрэ.
Саха сиригэр миграннар киириилэрин, төһө элбэхтэрин интэриэһэргииллэр. Саха сирэ долгуйара сөп. Ол эрээри, олохтоохтор, хаһаайыттар буоларбыт быһыытынан, бэйэ бодобутун тардыныахха наада.
2 Хомустаах нэһилиэгин олохтоохторо улуус, Правительство таһымнаах отчуоттар чопчу үчүгэйдик ааһар буолбуттарын, делегация эдэримсийбитин бэлиэтииллэр. Ол курдук, Нам улууһа тутууга сөҕүмэр үгүһү ситиспитин хайгыыллар. Холобура, орто нэһилиэккэ 2 Хомустаахха дьоҥҥо туһалаах саҥа объектар олоххо киирбиттэрэ элбэҕи этэрин ыйаллар.
Нам улууһун куратора, бөлөх салайааччыта Гаврил Кириллин 2 Хомустаах олохтоохторун Сахабыт сирэ сайдарын туһугар бииргэ үлэлииргэ ыҥырар уонна эрэнэрин биллэрэр.
Харысхан Попов