Дойдубутугар Педагог уонна Наставник, өрөспүүбүлүкэбитигэр Үлэ сылынан биллэриллибит 2023 с. түмүктэнэрэ чугаһаата. Мантан хаалбыт кэмҥэ тэрилтэлэр туох-ханнык үлэ барбытын, былаан төһө туолбутун көрүнүөхтэрэ. Оттон үөрэх эйгэтин тэрилтэлэрин баазатын бөҕөргөтүүгэ туох үлэ барда?
Семен Румянцев, Нам улуустааҕы үөрэх управлениетын материальнай-техническэй хааччыйыы отделын кылаабынай специалиһа:
— Сайыҥҥы кэмҥэ саҥа үөрэх дьылыгар бэлэмнэнэн улууспут 34 үөрэҕин тэрилтэтигэр барыта 38 726,594,77 мөл. солк. суумаҕа өрөмүөн үлэтэ ыытылынна. М.К. Аммосов аатынан Хатырык орто оскуолатын дьиэтигэр, РФ президенэ Владимир Путин көҕүлээбит «Модернизация школьных систем» федеральнай программа чэрчитинэн, капитальнай өрөмүөн барда: ититэр систиэмэтин, электрическэй уотун ситимин уларытыы, антитеррор хамсааһыҥҥа сөп түбэһиннэрэн, видеонаблюдение систиэмэтэ тардылынна, оскуола территорията тимиринэн күрүөлэннэ. 21 722 551 мөл.солк. суумалаах үлэни «ЭКОФОРС» ХЭТ (ген. дир. Николай Гордеев) толордо.
2023 сылга 1 Хомустаахха, Хатырыкка, 2 Хомустаахха 75-тии миэстэлэрдээх, Кыһыл Дэриэбинэҕэ 35 миэстэлээх оҕо саҥа уһуйааннара тутуллан үлэҕэ киирбиттэрэ, Бэдэрээтчиттэринэн «Прогресс-Проект» ХЭТ (ген.дир. Нюргун Спиридонов), «Намстрой» ХЭТ (ген.дир. Вадим Кутуков) уонна «Прогресс» ХЭТ (ген. дир. Алексей Пинигин) үлэлээбиттэрэ.
Үөрэхпит управлениетын сайаапкаларынан 2022-2023 сылларга оскуолалары транспорынан хааччыйыыга «Школьный автобус» государственнай программа чэрчитинэн, СӨ үөрэҕин министиэристибэтиттэн икки ПАЗ автобус ананан, Хатырык уонна 2 Хомустаах орто оскуолаларыгар бэриллибитэ.
«Доступная среда» МЦП чэрчитинэн улууспут 12 үөрэҕин тэрилтэлэригэр инбэлииттэргэ аналлаах тактильнай мнемосхемалар, пиктограммалар, Брайль шрифтээх вывескалар, итинник шрифтээх былаан-схемалар, перекатной, телескопическай пандустар, тутуһар порученнэр о.д.а. тэриллэр түҥэтиллибиттэрэ. Ити курдук үөрэх тэрилтэлэрин баазаларын хаҥатыыга үлэлэһэбит.
Касьян Олесов-Олук