Бүгүн Аппааны сэлиэнньэтин олохтооҕо, үлэ, тыыл бэтэрээнэ, СӨ “Гражданская доблесть” бэлиэ хаһаайката, Нам улууһа, Хатыҥ Арыы нэһилиэк «Ытык киһитэ», Учууталлар учууталлара, Саха Өрөспүүбүлүкэтин үөрэҕириитин туйгуна Эверстова Мария Егоровна 90 сааһын туолла.
Мария Егоровна 1956 сылтан 2004 сылга диэри, 48 сыл устата эҥкилэ суох, Хатыҥ Арыы орто оскуолатыгар улуу нуучча тылын тыа оҕолоругар үөрэппитэ. Кэргэнинээн Михайлов Владимир Саввичтыын ыал буолан олорбуттара 61 сылларын бэлиэтээбиттэрэ, СӨ «Кыһыл көмүс дьиэ кэргэн» бэлиэнэн наҕараадаламмыттара, Нам улууһун «Бастыҥ дьиэ кэргэн» кинигэтигэр киирбиттэрэ. Мария Егоровна 1962 с. ССРС Верховнай Советын депутата буолан, Саха Өрөспүүбүлүкэтин аатыттан Москубаҕа тиийэн үрдүк трибунаттан тыл эппитэ. 1964 с. ССРС алтыс ыҥырыылаах Верховнай Советын төрдүс сессиятын депутата буолар. Кэлин уонтан тахса сыл пропагандист, лекторскай бөлөх биир көхтөөх лектора этэ.
Бу үөрүүлээх күҥҥэ Хатыҥ Арыы нэһилиэгин баһылыга Иван Ноговицын Дойду президенэ Владимир Путин, СӨ Ил Дархана Айсен Николаев эҕэрдэ суруктарын, Нам улууһун «Ытык саас» бэлиэтин уонна «Хатыҥ Арыы нэһилиэгэ» МТ эҕэрдэ суругун, бэлэҕин, сибэкки дьөрбөтүн туттарда.
Ытыктыыр киһибитигэр Мария Егоровнаҕа чэгиэн доруобуйаны, уһун үйэни, дьиэ кэргэнигэр иллээх олоҕу баҕарабыт.
Надежда Сивцева