Хатыҥ Арыы нэһилиэгэр түөлбэлэр икки ардыларыгар сыллата ыытыллар «Тобул» интеллектуальнай оонньуу быйыл Дьиэ кэргэн сылыгар анаан, «Ааҕар дьиэ кэргэн» күрэх быһыытынан ыытылынна. Сыл устата нэһилиэкпит түөлбэлэриттэн дьиэ кэргэттэр көхтөөх кыттыыны ыллылар. Полуфиналга Нария Ильинична кыргыттарынаан Фея, Сияна Семеновтар, эбээлэрэ Аргунова Тамара Николаевналыын «Озернай» түөлбэттэн, Любовь Николаевна, Сергей Сергеевич Колодезниковтар кыыстарынаан Тускулааналыын Граф Биэрэгин «Восход» түөлбэттэн уонна Кыһыл Дэриэбинэттэн «Сандаара» түөлбэттэн Элеонора Романовна оҕолорунаан Спартак, Сардаана Багынановтар кыттыбыттара.
Семеновтар, Колодезниковтар дьиэ кэргэттэрэ финалга тахсаннар, ахсынньы 20 күнүгэр Хатыҥ Арыытааҕы олохтоох библиотекаҕа Варвара Носкова күрэх тэрийэн ыытта. Күрэххэ кыттааччылар үс түһүмэҕинэн кытыннылар, дьиэ кэргэттэрин билиһиннэрдилэр, «Дьиэ кэргэнинэн ааҕабыт» түһүмэххэ дьиэ кэргэнинэн сөбүлээн ааҕар кинигэлэрин кэпсээтилэр.
Любовь Николаевна Намнааҕы 2-с нүөмэрдээх орто оскуолаҕа логопед-учуутал, кэргэнэ Сергей Сергеевич «Прогноз-Серебро» ХЭТ-кэ кладовщик, кыыстара Тускулаана Намнааҕы 1 нүөмэрдээх орто оскуола 4-с кылааһын үөрэнээччитэ. Дьиэ кэргэнинэн сөбүлээн ааҕар кинигэлэринэн Эльза Бесков ааптардаах «Груша, корица и фиалка», «Принцесса и яблоня», «Ягоды в лукошке» буолаллар. Онтон Семеновтар улахан дьиэ кэргэн хаһаайката Нария Ильинична Намнааҕы гимназияҕа физкультура учуутала, кэргэнэ Сергей Сергеевич ДЮСШ-ҕа көҥүл тустуу аҕа тренерэ, түөрт оҕолоохтор, Фея Намнааҕы гимназияҕа 6-с кылаас үөрэнээччитэ, Федор гимназия 4-с кылаас үөрэнээччитэ, Саргын, Сияна оҕо уһуйаанын иитиллээччилэрэ, эбээлэрэ Тамара Аргунова Граф Биэрэгинээҕи олохтоох библиотека сэбиэдиссэйэ. Нария Ильиничналаах дьиэ кэргэнинэн бэйэлэрэ оҥорбут «Өрөбүлгэ бииргэ» бырайыактарын кэпсээтилэр. Түмүккэ күрэхтэһээччилэр саҥа дьыллааҕы викторинаҕа ыйытыыларга хоруйдаатылар.
Тэбис-тэҥ киирсии түмүгүнэн Колодезниковтар уонна Семеновтар дьиэ кэргэттэрэ кыайыылааҕынан тахсан, олохтоох библиотека аатыттан грамоталарынан уонна сэмэй бэлэхтэринэн наҕараадаланнылар.
Надежда Сивцева