Аан дойду чуумпуран, иһийэн турар кэмигэр

Н.М. Рыкунов аатынан улуустааҕы библиотекаҕа Нам сэлиэнньэтин олохтоохторугар Таҥха туһунан билиһиннэрэр, кэпсиир тэрээһин буолбута. Тохсунньу ый сахаларга инникитин туох буоларын билгэлиир, таайар кэм күннэрэ буолалларынан биллэр.

Эдэр алгысчыт, хомусчут Геннадий Игнатьев-Айыы оҕото Таҥха чуумпу кэм диэн ааттыыр. Сыл саҕаланыыта бу кэмҥэ Аан дойду иһийэн, чуумпуран арыллан турар күннэрэ буолалларын Геннадий Игнатьев бигэргэтэр. Ол курдук, үгүс норуот, киһи-аймах таайтарыылаах таҥха кэмигэр көрүүлэнэр итэҕэллээхтэр, уруккуттан олохсуйан хаалбыт үгэстээхтэр, сиэрдээхтэр.

Аны туран, бу күннэргэ Орто дойду олоҕор сүллүүкүн диэн харамай, айылҕа дьиктитэ тахсар диэҥҥэ үгүстэр итэҕэйэллэр. Дьээбэҕэ, тус бэйэм оҕо сылдьан ыйдаҥа сырдыгар күрүө маһыгар көстүбүт хахайдыҥы түү сиэллээх кыыл дуу, киһи дуу күлүгэ саһа-саһа үөмэн иһэрин көрөн аһарбыттаахпын. Үчүгэйгэ эбэтэр куһаҕаҥҥа көстүбүтүн билбэтин ааһан, бу харамай айыы эбэтэр адьарай аймаҕар киирэрин чопчу этэр кыахпыт суох.

“Дьиҥнээхтии билгэлээһин, таайтарыылаах күннэр 14 чыыһылаттан саҕаланаллар. Саха дьоно сөптөөхтүк сиэри-туому тутуһуу кинигэлэринэн сиэттэрэллэрэ хайаатар да наада.

Хас биирдии саха ыалыгар буруолатарга сөптөөх көмүлүөк баар буолуохтаах дии саныыбын эбэтэр саха норуотун көрдөрөр, кэпсиир, үчүгэйи түстүүргэ оҥоһуктар дьиэ ахсын бааллара буоллар”, – диэн этэр Айыы оҕото.

Дария Романова-Сиэллээх Сэгэйэ кэлбит дьоҥҥо алгыс анаата. Бэлиэтээн эттэххэ, алгыс кэмигэр күүстээх тыллаах алгысчыт тылын, этиитин уйбакка дьон уҥар, өйүн сүтэрэр диэн этээччилэр. Маннык көстүүгэ үксүн оҕолор, эдэр дьон уйааччыллара суох диэччилэр.

Алгыс ылыы, сиэр-туом кэпсэтиитин кэнниттэн, тус идэлээхтэр дьон ыйытыытыгар хоруйдаатылар, сүбэ-ама биэрдилэр.

📹Роман Шапошников

Харысхан Попов

Читайте дальше