Өрөспүүбүлүкэбит сайдыытыгар сүдү кылаатын киллэрсибит, биллиилээх государственнай уонна общественнай салайааччы быһыытынан ураты суолталаах үлэлээх-хамнастаах биир дойдулаахпыт Николай Семенович Охлопков бүгүн төрөөбүтэ 95 сылын туолла. Кини аатын сүгэр үөрэх кыһата – гимназия бу бэлиэ күнү көрсө, араас хабааннаах тэрээһиннэри былааннаан, дьоһуннаахтык тэрийэн кэллэ. Ол курдук, Николай Охлопков үбүлүөйүн көрсө, оскуола түмэлин саҥардан, тупсаран оҥорууттан саҕалаан үлэ-үөрэх хаамыытын үмүрүппүтүнэн барбыппыт.
Олунньу 3 күнүгэр Николай Семенович Охлопков өрөгөйдөөх үбүлүөйүн бэлиэтээһин саҕаламмытын бигэргэтэн үөрүүлээх тэрээһин буолбута. Бу күн Охлопковтар оҕолоро Марианна Николаевна уонна Екатерина Николаевна, Нам улууһун, Ленскэй нэһилиэк дьаһалтатын салайааччылара Ытык киһибит туһунан өссө биирдэ ахтан-санаан, кини дойдубут сайдыытыгар өҥөтө ураты суолталааҕын бэлиэтээбиттэрэ.
Үбүлүөйдээх тэрээһин чэрчитинэн, тохсунньу 19 күнүгэр үөрэх аныгы технологиятын баһылыыр сыаллаах-соруктаах улуустааҕы семинарга гимназия учууталлара сингапурдуу үөрэтии ньымаларын хайдах быһыылаахтык тутталларын көрдөрбүттэрэ. Семинар кыттыылаахтара сингапурдуу үөрэтии — аныгы үөрэх биир сэргэх, оҕону умсугутар, айымньылаах үлэ көрүҥэ, гимназия учууталлара кэккэ сыл бу ньыманы үөрэтэн, уруокка көдьүүстээхтик туттан, балайда уопут мунньан биир идэлээхтэригэр үллэстэллэрэ хайҕаллаах суол буоларын эппиттэрэ.
Биир сонун тэрээһин Нерюнгри куоракка айан буолбута. Таастаах, Түбэ, гимназия учууталлара, үөрэнээччилэрэ түмсэн, Николай Семенович Охлопков үлэлээбит сирдэрин устун, баараҕай тутууларын көрөн, сөҕөн-махтайан кэлбиттэрэ.
Николай Семенович Охлопков кэргэнэ Мария Егоровна үөрэҕирии эйгэтин сайыннарыыга үтүмэн үтүөлээх, учууталлар учууталлара буолар. Улууспут алын сүһүөх оҕолоро “Ступеньки в науку” билим түһүлгэтигэр мустан араас хабааннаах үлэлэрин, бырайыактарын көмүскээбиттэрэ, наука кэскиллээх аартыктарын арыйарга холоммуттара.
Николай Семенович Охлопков олоҕун, үрдүк таһымнаах үлэтин сырдатыыны гимназия учууталлара, үөрэнээччилэрэ бигэ сорук курдук ылынан бу кэм устата улуус, өрөспүүбүлүкэ туонатыгар үгүстүк иһитиннэрдилэр, кэпсээтилэр. Ол курдук, оскуолабыт директора А.В. Новгородов үгэс буолбут үөрүүлээх тэрээһиҥҥэ, Өрөспүүбүлүкэ күнэ түмэр түһүлгэтигэр, Максим Аммосов төрөөбүт сиригэр Хатырыкка буолар бастыҥтан бастыҥнар түмсүүлэригэр “Николай Охлопков – созидатель” диэн аһаҕас уруок ыыппыта үтүө холобур буолар.
Николай Семенович олоҕун былаһын тухары үөрэҕи, билиини өрө туппут киһи этэ диэн чугас дьоно бэлиэтииллэр. Үөрэх араас предметигэр олимпиадаҕа кыттан оҕо эргиччи сайдар, дьоҕурун чочуйар, кэскилин уһансар. Саха Өрөспүүбүлүкэтин гимназияларын, лицейдэрин түмэр бастакы Бэрэсидьиэммит Михаил Николаев аатынан ситим олимпиадатын ыытыы үгэс буолла. Быйылгы олимпиаданы Нам гимназията тэрийдэ, 8-11 кылаас оҕолоро үөрэх хас да хайысханан билиилэрин тургутан көрдүлэр. Киһи үөрүөх, гимназия үөрэнээччилэрэ инники күөҥҥэ тахсан, хамаанданан бастаатылар, бастыҥ буолалларын бигэргэттилэр.
Сылайары билбэккэ үлэлиир, харыс да халбарыйбакка иннин диэки дьулуһар киһи үгүһү ситиһэр. Николай Семенович Охлопков олоҕун оҥкулун, дьиэ акылаатын бигэтик уурар курдук, бииртэн биир үктэли дабайан чахчы чаҕылхай олоҕу олорбут эбит. Быйыл гимназия бастыҥтан бастыҥнары чиэстиир үөрүүлээх тэрээһинэ Николай Семенович төрөөбүтэ 95 сылыгар ананан өрө көтөҕүллүүлээх, ураты иэйиилээх буолан ааста. Оскуолабыт учууталлара, үөрэнээччилэрэ, төрөппүттэр тумус туттар киһибит аатын чиэстээхтик ааттатан, өрөспүүбүлүкэбит, улууспут, нэһилиэкпит сайдар кэскиллээх диэн бигэ эрэллээхпит.
Гимназия, улууспут дьоно-сэргэтэ түмсэн, Николай Семенович Охлопков дьоһун олоҕун, үлэтин-хамнаһын, салайар сатабылын үрдүктүк сыаналаан, тумус туттан, Ытык киһибит үбүлүөйүн үөрэ-көтө, ситиһии көтөллөөх көрсөбүт. Саха Өрөспүүбүлүкэтин аар-саарга аатырдан, баараҕай тутуулары туттаран, кэскиллээҕи уһансыбыт биир дойдулаахпыт, Эҥсиэли саарына Николай Охлопков аата үйэлэргэ умнуллубатын.
Аэлита Попова