Саха биир талааннаах суруйааччыта Е.С. Сивцев-Таллан Бүрэ үбүлүөйдээх 115 сылын түмүктүүр тэрээһин олунньу 7 күнүгэр Нам улууһун Бөтүҥ нэһилиэгин С.П. Оконешников аатынан «Айылгы» култуура киинигэр ыытылынна.
Дьоро күн «Ахтыах ааттарын көмүс тылынан» диэн Таллан Бүрэ «Кэллим кэпсээри» кинигэтин дьүһүйүүттэн саҕаланна. Үөрэнээччилэр, учууталлар кыттыылаах дьүһүйүү үс түһүмэҕинэн туруоруллунна: маҥнайгы чааһыгар «Сулустар» диэн поэма ис хоһоонугар ананна, иккис чааһыгар сэрии тиэмэтигэр суруйбут хоһоонноро, түмүккэ Улуу Кыайыы 80 сылыгар ананна. Литературнай дьүһүйүү Таллан Бүрэ доҕоро Чаҕылҕан хоһоонуттан киллэриллибитэ олус бэрткэ табыллан көһүннэ.
Литературнай композицияны бэйэтин көрүүтүнэн туруорда саха тылын учуутала Т.Р. Протопопова, ылбаҕай ырыалары бэлэмнээтэ муусука учуутала Н.С. Макарова.
Тэрээһиммитигэр ыҥырыылаах ыалдьыттарынан буоллулар: Нам улууһун баһылыгын солбуйааччы Ю.В. Дьяконов, норуодунай суруйааччылар — Н.И. Харлампьева, Е.В. Слепцова-Куорсуннаах, улуустааҕы үөрэх салалтатыттан Ю.П. Жергина, «Отуу уота» Нам улууһун литературнай түмсүүттэн М.П. Мохначевская-Марта Мария, М.Н. Елисеева, улуустааҕы библиотекаттан Н.В. Павлова, Р.Н. Дьяконова, режиссёр И.С. Новиков уонна Таллан Бүрэ оҕолоро, сиэннэрэ, аймахтара.
Е.С. Сивцев-Таллан Бүрэ үбүлүөйдээх 115 сылыгар анаммыт тэрээһиннэргэ элбэх үлэни ыыппыт, бэйэлэрин кылааттарын киллэрбит дьоммут улуус баһылыгын Махтал суругунан бэлиэтэннилэр: улуус култууратыттан режиссер И.С. Новиков, Бөтүҥ нэһилиэгин модельнай библиотекатын сэбиэдиссэйэ В.С. Колесова, Бөтүҥ орто оскуолатын учууталлара М.М. Осипова, Т.Р. Протопопова, улуустааҕы библиотека үлэһиттэрэ Н.В. Павлова, Р.Н. Дьяконова, бэйиэт уола С.Е. Сивцев-Хамалҕа.
Олохтоох дьаһалта аатыттан Махтал сурук улуус баһылыгын солбуйааччытыгар, үбүлүөйдээх хамыыһыйа бэрэссэдээтэлигэр Юрий Вячеславович Дьяконовка, саха норуодунай суруйааччытыгар, РФ уонна СӨ култууратын үтүөлээх үлэһитигэр Наталья Ивановна Харлампьеваҕа, саха норуодунай суруйааччытыгар, СӨ үтүөлээх артыыһыгар Елена Васильевна Слепцоваҕа-Куорсуннаахха, Нам улууһун үөрэҕириитин салалтатын иитии уонна эбии үөрэхтээһин салаатын сүрүн специалиһыгар Оксана Егоровна Васильеваҕа туттарылынна.
Дьоро киэһэҕэ элбэх истиҥ тыллар, ахтыылар, хоһооннор этилиннилэр, эҕэрдэ ырыалар ылланнылар. Тэрээһини иилээн-саҕалаан ыыттылар М.М. Осипова, Е.М. Софронов.
Тэрээһин түмүктэниитэ Таллан Бүрэ кийиитэ СӨ нэһилиэнньэтин харысхаллаах буолуутун үтүөлээх үлэһитэ, СӨ госсулууспатын туйгуна А.П. Сивцева үтүө үгэскэ кубулуйбут туйгун, ситиһиилээх үөрэнээччигэ аҕаларын аатынан анал стипендияны ытыс тыаһынан доҕуһуоллатан 9-с кылаас үөрэнээччитигэр Виктория Сивцеваҕа туттарда. Виктория олус долгуйан туран, харда махтал тылын эттэ.
Ураты тыыннаах тэрээһин сүрдээх истиҥ ис хоһоонноохтук ыытылынна. Түбүктээх кэм быыһыгар кэлэн ыалдьыттаан барбыт дьоммутугар Е.С. Сивцев-Таллан Бүрэ аатынан Бөтүҥ орто оскуолатын кэллэктиибин аатыттан махталбытын тиэрдэбит.
Е.С. Сивцев-Таллан Бүрэ аатынан Бөтүҥ орто оскуолатын пресс-киинэ.