Харандааһынан уруһуйдаммыт мэтириэттэри, айылҕа кэрэ көстүүтүн сэргии көрдүм, оттон сылаас, сымнаҕас сэлиэччиктэри, былааччыйалары, былааттары эр киһи баайбытын истэн өссө улаханнык сөхтүм.
— Өрөспүүбүлүкэтээҕи онлайн ыытыллар «Саха сирин талааннара» фестиваль-куонкуруска бэлэмнэнэн декоративнай-прикладной искусство жанрыгар икки талааннаах дьоммут – доруобуйа харыстабылын бэтэрээнэ, СӨ үтүөлээх бырааһа, Россия донора, Нам улууһун, Ленскэй нэһилиэк Ытык киһитэ, бэтэрээннэр «Иэйии» түмсүүлэрин төрүттэспит, 1995-2023 с.с. салайбыт, сцена бэтэрээнэ, билигин настаабынньыктыыр ытык кырдьаҕаспыт Василий Егорович Никонов уонна педагогическай үлэ бэтэрээнэ, СӨ үөрэҕириитин туйгуна, сэрии сылларын оҕото, спорт, сценабэтэрээнэ Калисфена Васильевна Бугаева үлэлэрин быыстапкаҕа туруордубут, кинилэр кыттыахтара уонна түмсүүбүтүттэн өссө ансаамбылынан, ону таһынан хорунан ырыа толоруутугар киирсиэхпит, онно бэлэмнэнэбит, — диир «Иэйии» түмсүү саҥа салайааччыта Пелагея Ивановна Никонова.
Улууспут киинин олохтоохторо, ыалдьыттара айар талааннаах аҕам саастаах дьон кэрэ айымньыларын сэлиэнньэбит кырдьаҕастарын балаҕаныгар кэлэн кэрэхсии көрүҥ, элбэххэ үөрэниҥ.
Видеону көр — https://t.me/gazetaensieli/13488
Касьян Олесов-Олук