Бүгүн, балаҕан ыйын 14 күнүгэр, Никольскай нэһилиэк «Веснянка» оҕо уһуйаана, иитээччилэр Кириллина Т.С., Нератова З.В. уонна Никольскай алын сүһүөх оскуолатын маҥнайгы кылааһын оҕолоро, учуутал Нератова С.Е. бииргэ түмсэн, «Айылҕам күһүҥҥү бэлэхтэрэ» диэн бииргэ үлэлиир сыллааҕы былааннарын маҥнайгы тэрээһинин ыыттылар, көмүс күһүн биир үтүө күнүн олус туһалаахтык атаардылар.
Бу күн оҕолор туунан балыктааһын сатабылларыгар уһуйулуннулар, көрдүлэр-иһиттилэр, илиилэринэн тутан-хабан элбэҕи биллилэр. Маны барытын Никольскай оскуолатын үлэһитэ Собакин Н.Н. сиһилии кэпсээтэ, көрдөрдө, билиһиннэрдэ.
Күлүмүрдэс көмүһүнэн сууламмыт күһүҥҥү тыаҕа оҕолор дуоһуйа сынньаннылар, айылҕа араас матырыйаалларын хомуйдулар, бөлөҕүнэн түмсэн үлэлээтилэр, сүүрдүлэр-көттүлэр, тэтимнээх оонньуулары оонньоотулар, билиилэрин хаҥатыннылар.
Өбүгэ утумун ситимниир төрүт дьарыктар, үтүө үлэлэр салгыы да сайда, бииргэ үлэлэнэ туруохтуннар. Тэрээһиҥҥэ кыттыбыт төрөппүттэрбитигэр, иитээччилэрбитигэр, үлэһиттэрбитигэр, оҕолорбутугар махтанабыт.
Зинаида Нератова-Тупсууна, Николькай нэһилиэк «Веснянка» оҕо уһуйаанын иитээччитэ