Фрунзе нэһилиэгин олохтооҕо, Буоратай аатынан НАК салайааччыта Татьяна Ядрихинская дьиэ кэргэнин алаһа дьиэтэ уокка былдьанан, онно көмөлөһөн «Күн киһитэ көмүскэс, айыы киһитэ аһыныгас» аһымал кэнсиэр буолла. М.К. Аммосов аатынан дыбарыас саалатыгар алдьархайга түбэспиттэри өйөөн көрөөччүлэр толору муһуннулар.
Улуус баһылыга Юрий Слепцов, Фрунзе баһылыга Роман Трофимов, культура үлэһиттэрин аатыттан Семен Ядрихинскай, Николай Жирков, дьахтар сэбиэтиттэн Ирина Находкина биир санаалаахтарын биллэрдилэр, кылааттарын киллэрдилэр. Ону таһынан Фрунзеттан төрүттээх куорат ыччаттара, Вадим Кутуков көмө оҥордулар.
Кэнсиэр кэмигэр барыта 373000 солкуобай киирдэ, ол иһигэр кэнсиэр билиэтиттэн 227 тыһыынча. Улуус үгүс нэһилиэктэриттэн акцияҕа кытыннылар. Георгий Белоусов истиҥ-иһирэх тылларынан салайан ыыппыт аһымал кэнсиэрэ Кирилл Матвеев ырыаларынан саҕаланна, Ырыа Саарын саҥа дыбарыас үрдүк сыанатыгар бастакы тахсыытынан түмүктэннэ. Сылаас сыһыан дьон санаатын кынаттаата.
Мария Винокурова