Биир дойдулаахпыт, спорт үрдүк көрдөрүүлэрин иһин улахан кылаатын киллэрбит Александр Игнатьев аатынан спартакиада буолуоҕа. Нам улууһун нэһилиэктэрэ муус устар 12-13 күннэригэр Александр Игнатьев аатынан IV төгүлүн ыытыллар спартакиадаҕа күрэхтэһиэхтэрэ. Спартакиада нэһилиэктэр икки ардыларыгар ыытыллар комплекснай спартакиада суотугар киирэр.
Спартакиада маҥнайгы күнүгэр Култуура-спорт комплекс саалатыгар дьахталларга волейбол, буулдьанан ытыы көрүҥнэрэ буолуохтара. Оттон эр дьон волейбола уонна төрүт ох саанан ытыы Хамаҕаттаҕа “Эрчим” спорт саалаҕа ыытыллыахтара. Дьахталлар волейболлара, төрүт ох саанан ытыы, буулдьанан ытыы көрүҥнэрэ 9.00 ч саҕаланыахтара. Оттон эр дьоннор 13.00 ч оонньуохтара.
Муус устар 13 күнүгэр Култуура-спорт комплекска волейбол, гиирэ спорда 9.00 ч саҕаланыахтара. Саахыматчыттар Хамаҕатта балаҕаныгар эмиэ 9.00 ч көрсүөхтэрэ. Тэрээһин үөрүүлээх чааһа 12.00 КСК дьиэтигэр буолуоҕа. Волейболга бастыҥнары быһаарыы 13.00 ч саҕаланыаҕа.
“Спорт управлениета Ытыктанар Игнатьев Александр Афанасьевич аатынан спартакиаданы оҥорор эбээһинэстээх. РФ физическай култуура туйгуна, РФ уопсай үөрэҕириитин бочуоттаах үлэһитэ, СӨ физическай култууратын үтүөлээх үлэһитэ, СӨ үөрэҕириитин туйгуна, Нам улууһун бочуоттаах олохтооҕо Александр Игнатьев көмөтүнэн үгүс спортсмен таһымнаах күрэхтэһиилэргэ тахсыбытын санатабыт”, – диир улуустааҕы спорт управлениетын салайааччытын солбуйааччы Сергей Софронов.
Харысхан Попов