П.П. Ядрихинскай-Бэдьээлэ аатынан Намнааҕы Олоҥхо дьиэтин иһинэн үлэлиир “Алгыс” вокальнай ансаамбыл бэс ыйын 11-18 күннэригэр Санкт-Петербург куоракка норуоттар икки ардыларынааҕы 9-с төгүлүн ыытыллар “Добровидение” фестивальга кытынна, үөрүү кынаттанан кэллэ.
“Фестиваль РФ госдума депутата О.А. Нилов көҕүлээһининэн ыытыллар. Фестивалга араас дойдулартан 3000 кэриҥэ кыттааччы кэлэн бэйэлэрин норуоттарын, култуураларын көрдөрдүлэр. “Алгыс” ансаамбыл фестивальга Петропавловскай кириэппэс Соборнай киин болуоссатыгар Россия аатырбыт, биллэр судаарыстыбаннай ансаамбыллары кытта бииргэ ыллыыр чиэскэ тиксэн соһуйбуттара. Бэлиэтээн эттэххэ, болуоссакка тахсан ыллыырга суолталаах сүүмэрдээһини ааһаҕын. Фестиваль түмүгүнэн, “Алгыс” ансаамбыл кыттааччыларыгар РФ госдума депутаттарыттан О.А. Нилов, биир дойдулаахпыт Ф.С. Тумусовтан махтал суруктары туппуттара.
Маны сэргэ, Россия күнүгэр Санкт-Петербург киин библиотеката тэрийбит уулуссатааҕы бырааһынньыгар “Книжная аллея-2024” тэрээһиҥҥэ ыллаан кыттыыны ылбыттара”, – диир ансаамбыл салайааччыта, хормейстер Ирина Неустроева.
Нам улууһун Далбар Хотуттара Москваҕа онлайн ыытыллыбыт Салават Юлаев 270 сааһыгар анаммыт бүтүн арассыыйатааҕы патриотическай “Батыр Навеки” фестивалга ситиһиилээхтик кыттыбыт. “Батыр Навеки” фестивалы тэрийээччилэр Батыршина Гульсина Алтыновна, Бабин Андрей Евгеньевич уонна СӨ култууратын үтүөлээх үлэһитэ, “Северный Колорит” фестиваль кэмитиэтин салайааччыта Варвара Валерьевна Обоюкова буолалларын Ирина Неустроева этэр.
Биир дойдулаахтарбыт байыаннай дьайыы кыттыылаахтарыгар бэйэлэрин сүрэхтэринэн, баҕа санааларынан барыанньа, собо миинэ илдьэн туттарбыттарын санатабыт.