Намнааҕы “Олимпик” спорт оскуола иитиллээччитэ Алина Аммосова Москва куоракка боксаҕа Бүтүн Россиятааҕы турнирга үрүҥ көмүс мэтээли ылан үөрүүнү үксэттэ.
Ол курдук, 2012 сыллааҕы Олимпийскай оонньуулар үрүҥ көмүс мэтээл хаһаайката Софья Очигава бирииһигэр кулун тутар 6-9 күннэригэр ыытыллыбыт үрдүк таһымнаах күрэхтэһиигэ биир дойдулаахпыт Алина элбэххэ үөрэммит, сатабылын үрдэппит буолуохтаах.
“Аан дойду икки төгүллээх, Европа үс төгүллээх кыайыылааҕа, спорт үтүөлээх маастара Софья Очигава бирииһигэр миэстэлэһии – үчүгэй көрдөрүү! Бойобуой майгылаах Аммосова Алинаны уонна тренер Дмитрий Захаровы өссө төгүл эҕэрдэлиэҕиҥ!
Кыыспыт Оксана Васильева (Гюрза) салалтатынан Саха сирин сүүмэрдэммит хамаандатыгар киирэринэн, намнар киэн туттабыт. Боксаҕа Гюрза диэн биллэр-көстөр аат буолар. Оксана Владимировна Аан дойду түөрт, Европа икки, КИТЭК лига түөрт төгүллээх чемпионката буолар”, – диир дириэктэр Юрий Балаганскай.
Саха сирин сүүмэрдэммит хамаандата аны сайын норуоттар икки ардыларынааҕы “Азия оҕолоро” оонньууга күрэхтэһиэҕэ.
Харысхан Попов