Бартыһаан нэһилиэгин олохтоохторо олус сэргэх кэнсиэр көрдүлэр. Андросов Коммунар Прокопьевич – 90, Андросова Варвара Николаевна 85 саастарынан, ыал буолбуттара 60 сылынан оҕолоро, сиэннэрэ, хос сиэннэрэ ийэлэрин, аҕаларын, эбээлэрин, эһээлэрин ахтан-санаан Россияҕа – Дьиэ кэргэн, Саха Өрөспүүбүлүкэтигэр Оҕо сылларынан “Дьоллоох дьиэ кэргэн” диэн Андросовтар аҕа уустарын кэнсиэрин көрдөрдүлэр.
Киирии билиэтинэн түөрт түһүмэҕинэн бириистэр уонна супер бириис оонньонно. Бастакы супер бириис – сервиз, иккис – эбиэс, үһүс – торт, төрдүс – гайковерт уонна шуруповерт элбэх оҕолоох биир бастыҥ дьиэ кэргэммитигэр Кривошапкина Александраҕа түбэспититтэн үөрдүбүт.
Кэнсиэр саҕаланыытыгар аҕа баһылык Алексей Зырянов эҕэрдэ тылын эттэ уонна наҕараадалары туттарда. Онтон Дьиэ кэргэн уонна ыччат политикатын управлениетын салайааччыта Екатерина Саввинова эҕэрдэ тылын анаата, наҕараада туттарда.
Нэһилиэкпит дьоно бу ый устата дьиэ кэргэттэр кэнсиэр туруорбуттарыттан сэргэхсийдилэр, сүргэлэрэ көтөҕүлүннэ. Бу кэнсиэрдэр саалаҕа тобус-толору көрөөччүлээх аастылар.
Маны тэҥэ, Андросовтар аҕаларын аатынан дуобакка күрэхтэһии тэрийэн ыыттылар. Уопсайа 12 хамаанда кэлэн кыттыыны ылла. Түмүккэ:
- 1 миэстэ – Ленскэй нэһилиэк;
- 2 миэстэ – Хатыҥ Арыы;
- 3 миэстэ – Партизан.
Анал бириистэри аҕам саастаах онньооччу дьахталлартан Розалия Егорова, эр дьоҥҥо Егор Леонтьев, үөлээннээҕэ Михаил Иванов ыллылар. Миэстэлэспит дьоҥҥо барыларыгар харчынан бириис ананна. Күрэхтэһиигэ сүрүн судьуйанан Анатолий Матвеев, секретарь Надежда Протопопова үлэлээтилэр.
Полина Скрябина