Партизаҥҥа муус устар 17 күнүгэр, киэн туттар суруйааччыбыт А.А. Парникова-Сабарай Илгэ төрөөбүтэ 65 сылыгар аналлаах “Хоһооҥҥо, буор көһүйэ сыыһыгар, Хомуллар ээ күн баайа-талыма” диэн хоһоон ааҕыытын күрэҕэ ыытылынна.
Күрэххэ нэһилиэкпит тэрилтэлэрэ, “Көмүлүөк” ветераннар түмсүүлэрэ, оскуола үөрэнээччилэрэ, биирдиилээн ааҕааччылар кыттыыны ыллылар.
Дьүүллүүр сүбэҕэ Парасковья Новгородова, Валентина Яковлева, Семён Алексеев сөптөөх сыаналааһыны оҥорбуттара. Биирдиилээн ааҕыыга, оскуола оҕолоругар кыайыылаах аатын 7 кылаас үөрэнээччитэ Колесов Радион ылла. Оттон улахан дьоҥҥо оскуола учуутала Иван Сыромятников. Көхтөөх кыттыыларын иһин тэрилтэлэр сертификат туттулар.
Хоһоон ааҕыыга муҥутуур кыайыылааҕынан 11 кылаас үөрэнээччитэ Семенов Артур ааттаммыта. Кини бастыҥ талааннаах үөрэнээччибит буолар. Бастыҥ ааҕааччыга Анна Парникова балта Альбина Алексеева харчынан бириэмийэ туттарда. Ону тэҥэ, Альбина Алексеева күрэххэ кыттыыны ылбыттарга бука барыларыгар барҕа махталын биллэрдэ.
Наммыт улууһун суруйааччыларыгар анаан Өркөн өй оонньуутугар тэрилтэлэр хамаандалара күөн көрсөн күрэхтэстилэр. Күрэҕи олохтоох библиотека тэрийэн ыытта.
Полина Скрябина