Ариан Сергеев, кылаабынай быраас: «База бөҕөргүүр, медицинэ өҥөтө тупсар»

Нам улууһугар доруобуйа харыстабылын үлэтигэр улуус кылаабынай бырааһа Ариан Сергеев санаатын үллэстэр.

Биһиги балыыһабытыгар РФ Президенэ Владимир Путин көҕүлүүр «Доруобуйа харыстабыла» национальнай бырайыак чэрчитинэн, «Доруобуйа харыстабылын бастакы сүһүөх звеноларын модернизациялааһын» региональнай программа тэрээһиннэрэ 2020 сылтан олоххо киириилэрэ саҕаламмыта. Ол курдук, Салбаҥ, Бөтүҥ нэһилиэктэригэр саҥа ФАП-тар, Аппааныга врачебнай амбулатория тутуллан үлэҕэ киирбиттэрэ. Билигин 2 Хомустаахха врачебнай амбулатория тутуллар. Ону сэргэ, ааспыт 2023 с. эмиэ бу олус туһалаах программаҕа киирэммит, Нам с. «50 миэстэлээх стационар» саҥа объект тутуута саҕаланар үөрүүлээх түгэнэ буолан ааспыта. Ити кэмтэн үлэ салҕанан ыытылла турар.

Медицинскэй аппарааттары, тэриллэри атыылаһыыга эмиэ үлэ барар. Холобур, поликлиникабытыгар  компьютернай томографияны туруоран үлэлэппиппит икки сыл буолла. Ааспыт сыл түмүгүнэн 1000 кэриҥэ киһи, ол иһигэр араас ыарыылаах, ыарахан да туруктаах ыарыһахтар, бу аппаракка түстүлэр, бэрэбиэркэни, диагностиканы аастылар. Бу биһиги үлэбитин чэпчэтэр, медиктэргэ күүстээх өйөбүл буолар, оттон дьон, ыарыһахтар ыраах барбакка, миэстэтигэр хаачыстыбалаах медицискэй көмөнү ылаллар.  

Бу программанан саҥа техниканан эмиэ хааччыллабыт. Ордук суһал медицинскэй көмөнү оҥоруу транспора көрүллэр. Ол курдук, бу аҕыйах сылга 7 саҥа автотранспоры ыллыбыт, ол иһигэр реанимационнай тэрээһиннэри ыытыыга толору хааччыллыылаах, бары медицинскэй оборудованиета баар 2 массыынаны уонна медицинскэй көмөҕө сүүрэр массыыналары. Бастатан туран, ыраах сытар, хаайтарыылаах Көбөкөн,  2 Хомустаах нэһилиэктэрэ хааччылыннылар. Ол кэнниттэн улахан Хамаҕатта, Аппааны нэһилиэктэрин уонна бу соторутааҕыта Хатырык врачебнай амбулаториялара саҥа массыыналаннылар. Эһиилги былааҥҥа 1 Хомустаах врачебнай амбулаторията автотранспорынан хааччыллыыга киирдэ. Бу программа салгыы салҕанан барыаҕа. Иккис сылын биһиги улууспут нэһилиэктэрин хабан, профилактическай медицинскэй тэрээһиннэри ыытыыга КАМАЗ базатыгар көһө сылдьар медицинскэй комплекс үлэлиир, билигин нэһилиэктэргэ графигынан көрүүнү саҕалаата.

Дойдубутугар «Земскэй доктор» федеральнай программа олоххо киириэҕиттэн, улуустааҕы киин балыыһабытыгар 60-тан тахса быраас онно кыттан үлэлээтэ. Кинилэртэн бүгүҥҥү күҥҥэ 20-чэ исписэлиис үлэ контрагын болдьоҕун бүтэрэн баран, салгыы үлэлии сылдьар.

Быйыл олунньу 13 күнүгэр дойдубут Президенэ Владимир Путин Форумҥа медицинэ алын сүөһүөх үлэһиттэригэр эбии ый аайы бэриллэр социальнай төлөбүрү олохтоон, улахан өйөбүлү оҥорбутун үөрэ иһиттибит.  

Ити курдук дойдубутугар үлэлиир көдьүүстээх национальнай бырайыактар, туһалаах программалар уонна медицинэҕэ улахан болҕомто уурулларыттан, тыа сиригэр дьон доруобуйатын туругун көрдөрүнүүгэ хаачыстыбалаах көмөнү ылар, материальнай-техническэй бааза бөҕөргүүр, медицинэ өҥөтө тупсар.

Касьян Олесов-Олук