Арыгы – бэйэтэ бэлэм дьаат. Сулустартан да сурас

Зодиак араас бэлиэлэригэр төрөөбүт дьоҥҥо арыгы хайдах дьайарын астрологтар маннык быһаараллар:

ХОЙ (21.3-20.4) – Бу бэлиэҕэ төрөөбүт арыгыны иһэрэ олус кутталлаах. Арыгы сүһүөҕэр охсор, биитэр дьиикэй дьайыыларга анньар. Хой өйдөөҕөр да оҥоруутун оҥорон баран биирдэ толкуйдуур, онтон иһэн баран…

ОҔУС (21.04-21.5) – Испит Оҕустан куттанар оруннаах. Дьиҥ иһигэр холку, киэҥ бэйэтэ арыгыны истэҕинэ, кыра да сылтахтан өрө бурҕайан турар – ол аатыгар да сыттаҕа, «оҕус» буугунаата да бүтэр.

ИГИРЭ (22.5-21.6) – Бу бэлиэҕэ арыгы улахан интэриэһи үөскэппэт, истэҕинэ да майгыта, тутта-хапта сылдьара уларыйбат, онон хампаанньаҕа кинилэр интэриэһинэй бэсиэдэни ордороллор.

АРААК (22.6-23.7) – Арыгы уонна пиибэ кинилэр доруобуйаларыгар кыр өстөөхтөр. Араактар намчы куртахтаахтар, психикалара сатарыйымтыа. Сороҕор көргө-нарга кэлэн баран арыгы иһээт ытыыллар-соҥууллар.

ХАХАЙ (24.7-23.8) – Икки биричиинэнэн арыгыны иһэртэн туттунуохтаах. Бастатан, арыгы сүрэҕэр аһара дьайар, ноҕоруускалыыр. Иккиһинэн, иһэр Хахайтан тулатыгар баар дьон кэлэйэр, аптарытыатын сүтэриэн сөп. Онон үрүүмкэни көтөҕүөн иннинэ кини кыыллар «ыраахтааҕыларыттан» начаас эбисийээнэҕэ кубулуйуон сөбүн умнуо суохтаах.

КЫЫС (24.8-23.9) – Арыгы киниэхэ сүлүһүннээх дьаат. Үгүс Кыыс ону сэрэйэр, ол иһин кинилэр арыгыны утарааччыларынан буолаллар. Онтон ити үтүө майгыны тутуспаттар өйдүөх кэриҥнээхтэр: кинилэр быардара арыгыга түргэнник сатарыйар, доруобуйалара түргэнник айгырыыр.

ЫЙААҺЫН (24.9-23.10) – Кинилэр сүрүннээн «хампаанньаны өйөөн» арыгыны амсайаллар, ол сылдьан аһара туттан кэбиһэллэр, кыраҕа «ньаппайаллар».

СКОРПИОН (24.10-22.11) – Дьэ, бу бэлиэҕэ төрөөбүттэргэ арыгы суоһар сабыдыаллаах. Өйдөөҕөр боччумнаах Скорпион, итирдэҕинэ ханнык да хонтуруолу тутуспат, алдьархайы оҥоруон сөп. Бу дьоҥҥо – арыгылааһын син биир бэйэҕэ тиийиниигэ холоонноох.

ОХЧУТ (23.11-21.12) – Арыгыны астына амсайар, ол киниэхэ олус кутталлаах. Төһөлөөх дьоҕурдаах Охчут арыгыттан тэмтэрийбитэ буолуой? Бу бэлиэ дьонун быардарын арыгы начаас быһа тутар, гепатит, онтон – цирроз…

ЧУБУКУ (22.12-20.1) – Арыгы атыттарга курдук кинилэргэ «ньиэрбэни сынньаппат», кыһалҕаны төлөрүппэт, төттөрүтүн «хааһыта хойдор». Онон арыгыны иһэн тугу да туһаммат.

КҮРҮЛГЭН (21.1-19.2) – Арыгыга түргэнник ылларар, ньиэрбэтэ, майгыта начаас сатарыйар, илиитэ илибирэс, хаамыыта хаадьаҥнас – бэрт сотору астма уонна титириир ыарыы буулуур.

БАЛЫК (20.2-20.3) – Баларга арыгы төрүт наадата суох. Түргэнник холуочуйар, «абыраҕа-ибирэҕэ» суох сатаммат. Ону ааһан наркотиктарга түргэнник ылларар, адьас иэдэйэр.

Мантан көстөрүнэн, Зодиак биир да бэлиэтэ арыгыттан тугу да сүүйбэт, төттөрүтүн киһи аатыттан ааһар, сиэрэ-майгыта сатарыйар, олохторо айгырыыр.

«Чэйиҥ, доҕоттоор, өрүү доруобай буолуоҕуҥ, өрө тэйэ сылдьыаҕыҥ, ол туһугар «тас» гыннаран баран тааһын эрэ хаалларыҥ!» – хайдахтаах курдук албын-ылбаҕай тылларый, «тас» гыннарыаҥ иннинэ тохтоо, толкуйдаа, хайа бэлиэҕэ хайдах этэй?

В. КАСЬЯНОВ

«Эҥсиэли», 1993 с., от ыйын 17 к.