«Азия оҕолоро» норуоттар икки ардыларынааҕы VIII-с спортивнай оонньуулар түмүктэнэр күннэрэ тиийэн кэллэ.
Биһиги улууспутуттан, нэһилиэкпититтэн оонньууларга, араас тэрээһиннэргэ кыттыбыт оҕолорбутун сырдатыыны салгыыбыт.
Хамаҕатта оҕолоро көҥүл тустууга, буулдьанан ытыыга кыттыбыт буоллахтарына, бүгүн кэпсиир эдэр спортсмеммыт спорт королеватынан аатырар чэпчэки атлетикаҕа сүүрүүгэ кыттыбыта.
Кини — Владислав Тимофеев.
Владислав 2019 с. Хамаҕатта орто оскуолатын бүтэрбитэ. 2016 с. VI-с «Азия оҕолоро» спортивнай оонньууга 400 м. сүүрүүгэ, 4×100 эстафетаҕа кыттыбыта. Кини дьиэ кэргэниттэн 2012 с. эдьиийэ оонньууларга кыттыбыта.
Норуоттар икки ардыларынааҕы спортивнай оонньуу төрүттэммит сиригэр төннөн кэлэн ыытылла турара олус үөрүүлээх. Оонньууга кыттыы оҕо аайы тиксибэт түгэн. Элбэх дьарыгы, күрэхтэһиилэри аастаххына, көлөһүн тохтоххуна хамаандаҕа киирэҕин.
Владислав олоҕун спорду кытта сибээстээн Дьокуускайдааҕы педколледж адаптивнай спорт хайысхатын бүтэрэн, билигин ХИФУ физическэй культура уонна спорт институтугар салгыы үөрэнэ сылдьар.
Оҕолору спордунан дьарыктаналларыгар сүбэлиир.
Маргарита Охлопкова