Сыл саҕаланыаҕыттан Нам улууһугар 15 баһаар буолла. Былырыыҥҥыны кытта тэҥнээтэххэ, баһаар лаппа элбээбитэ бэлиэтэнэр (былырыын 3 этэ), 3 киһи уокка былдьанна, 1 киһи уоттан эчэйдэ.
Ыам ыйын уһун өрөбүллэрэ буолаары турарынан сибээстээн, улуус бары олохтоохторун баһаартан сэрэхтээх буолуу быраабылаларын, бары ирдэбиллэри хас биирдии киһи тутуһуохтааҕын, толоруохтааҕын өссө төгүл санатабыт.
Аһаҕас уоту туттуу уонна оттуур сирдэри өртөөһүн күүскэ бобуллар. Атыы-эргиэн урбанньыттарыгар шашлык буһарыы эмиэ бобууга киирсэр. Мангалга шашлык оносторгутугар аһаҕас уоту туттубакка, чоҕунан туттаргыт ирдэнэр. Мангал сирэ тутууттан 5 миэтэрэ ыраах буолуохтаах уонна 2 миэтэрэ төгүрүччү ыраастаныахтаах. Табахсыттар табаххытын талбыт сиргитигэр мээнэ быраҕымаҥ.
Улуус бары олохтоохторугар өссө төгүл санатабыт — АДПИ көдьүүһэ улахан. АДПИ – баһаары сэрэтэр тэрил, кыра да буруо сытыгар улахан тыас таһааран дьону сэрэтэр. Оннооҕор түүн ортото тыаһаан, дьону уһугуннаран иэдээн тахсарыттан сэрэтэр аналлаах. Хас биирдии ыал дьиэтигэр маннык тэрил баар буолуохтаах.
Баһаартан сэрэхтээх буолуу ирдэбиллэрин кэспиттэргэ административнай миэрэ туттулларын санатабыт. Ити РФ Бырабыыталыстыбатын 2020 сыл балаҕан ыйын 16 күнүнээҕи 1479 №-дээх «Арассыыйа Федерациятыгар баһаары утары эрэсиими бигэргэтии» уурааҕыгар олоҕуран ирдэниллэр.
Нэһилиэктэргэ баһаартан сэрэтэр үлэни ыытыыга эппиэтинэс баһылыктарга сүктэриллэр, 131-3 №-дээх Федеральнай сокуон олоҕуран баһаартан сэрэтэр үлэ күүскэ ыытыллыахтаах.
Саха Өрөспүүбүлүкэтин ыксаллаах быһыы-майгы министиэристибэтин Нам оройуонун надзордуур уонна сэрэтии үлэтин ыытар отделениета