Сыл аайы «Хаар айан – Саха сирин Кубога» өрөспүүбүлүкэтээҕи экстрим-күрэхтэһии элбэх кыттааччыны уонна көрөөччүнү түмэр. Быйылгы тэрээһин кулун тутар 31 күнүгэр Мэҥэ Хаҥалас улууһун Төҥүлүтүгэр буолан ааста. Күрэхтэһиигэ сүүмэрдиир түһүмэхтэри ааһан 15 инжектор уонна 15 карбюратор мотуордаах УАЗ массыыналар хаһаайыттара кытыннылар.
Нам улууһуттан УАЗ тимир көлөлөөх хас даҕаны экипаж улуустарга, өрөспүүбүлүкэҕэ ыытыллар күрэхтэһиилэргэ кытталлар, бириистээх миэстэлэргэ тахсаллар. «Хаар айан — Саха сирин Кубога» массыына спордун трофи-рейд көрүҥэр өрөспүүбүлүкэтээҕи кыһыҥҥы чемпионакка «Экстрим гонки», «Кольцевая гонка», «Супер экстрим» түһүмэхтэргэ илин-кэлин түһүстүлэр. «Карбюратор» түһүмэхтэригэр кимнээххэ да иннилэрин биэрбэккэ чемпион үрдүк аатын Нам улууһуттан «Ураган» экипаж сүгэн «Regulmoto» матасыыкылынан наҕараадаланнылар.
«Ураган» экипаж дьиэ кэргэнниилэр буолаллар, суоппар – Николай, штурман – Клавдия. Сивцевтэр Бөтүҥ нэһилиэгин олохтоохторо, 2 уол оҕолоохтор. Николай П.П. Юмшанов аатынан Намнааҕы оҕо спорт оскуолатыгар харабылынан үлэлиир, ыал ийэтэ дьиэ хаһаайката, оҕолорун көрөр-истэр. Кинилэр маннык күрэхтэһиигэ бастакы холонуулара буолар.
«Карбюратор мотуордаахтарга чемпионнаабыт Николай Сивцев уонна кэргэнэ, штурмана Клавдия быйылгы «арыйыыбыт» буолла. Онон Сивцевтэр «Хаар айан» историятыгар атын сирэйи астылар. Киһи батыһар, сүгүрүйэр, сирдиир ыала буолан таҕыстылар. Биллэн турар, доҕоттор, убайдар, урукку кыттыылаахтар өйөбүллэрэ эмиэ тирэх буолбут буолуохтаах», — диэн тэрийээччилэр бэлиэтээбиттэр.
Кэлэр нэдиэлэҕэ Николайга «Хаар айан» маастара бэлиэтин туттарыахтара, Клавдия техникаҕа сыстаҕас, интэриэһиргиир буолан күрэхтэһиилэргэ кыттар, «Автоледилэри» кытары билсэр эбит. Быйыл, саҥа дьыл кэнниттэн, биир санааҕа кэлэннэр маннык күрэхтэһиилэргэ кыттаары анаан-минээн УАЗ массыына атыыласпыттар. Массыыналарын үчүгэйдик оҥостон, көрүнэн улуустарга ыытыллыбыт «Хаар айан» күрэхтэһиилэригэр ситиһиилээхтик кыттыбыттар. Ол курдук, Сунтаарга 1-кы, Уус Алдан Түүлээҕэр – 2-с, Бүлүүгэ – 4 миэстэ буолбуттар.
«Массыынабытын атыылаһаат да күрэхтэһиилэргэ кыттаары күүскэ бэлэмнэммиппит. Бу сыллааҕы биир да күрэхтэһиини көтүтэ иликпит. Кыайыылар да, хотторуулар да бааллар. Штурман буолар олус эппиэтинэстээх, барытын көрө-истэ, ыйа-кэрдэ олорор. Кэргэммэр — Клавдияҕа махталым улахан, эрэнэр эрэлим буолар. Манна кыттарбытыгар наставникпыт уопуттаах кыттааччы, «Фортуна» экипаһа Семен Игнатьев буолар. Кини сүбэлээн-амалаан, бэйэтигэр сыһыаран илдьэ сылдьар. Өрөспүүбүлүкэтээҕи күрэхтэһиигэ кыттарбытыгар «ПРО — Ремонт» (сал. Станислав Потапов) тэрилтэ көмөлөһөн уматыгынан хааччыйбытыгар махталбытын тиэрдэбит», — диэн дьиэ кэргэн аҕа баһылыга, экипаж суоппара Николай Сивцев санаатын үллэһиннэ.
Муус устар 6 күнүгэр Уус Алдан Мүрүтүгэр ыытыллар «Хаар айаҥҥа» «Ураган» экипаж кытта бараары ох курдук оҥосто, тып курдук тэринэ сылдьаллар. Ураты дьарыктаах Сивцевтэр дьиэ кэргэннэригэр ситиһиилэри, кыайыыны-хотууну баҕарабыт.
Семен Аргунов