Бүгүн Нам с. М.К. Аммосов аатынан култуура Дыбарыаһыгар Нам улууһун баһылыгын “Эҥсиэли эрэлэ” Саҥа дьыллааҕы харыйата улууспут оскуолаларын, эбии үөрэхтээһин тэрилтэлэрин бастыҥ үөрэнээччилэрин түмтэ.
Улуус баһылыга Юрий Слепцов олохтообут бириэмийэлэрэ бастыҥ үөрэнээччилэргэ Саҥа дьыллааҕы харыйаҕа 2017 с. саҕалаан, үгэскэ кубулуйан, сыл аайы туттарыллар.
Бэлиэ түгэҥҥэ ааһан эрэр 2024 сыл устата үөрэххэ ситиһиилэммит, олимпиадаларга, конференцияларга, куонкурустарга чаҕылхайдык кыттыбыт, култуура, спорт, патриотическай иитии, техническэй көрүҥ о.д.а. тэрээһиннэригэр үрдүк көрдөрүүлэри ситиспит бастыҥтан бастыҥ, чулууттан чулуу үөрэнээччилэри чиэстээһин үөрүүлээх быһыыга ыытылынна.
Энсиэли хочотун инники кэскилин — элбэҕи эрэннэрэр кэнчээри ыччаты, төрөппүттэри, ыҥырыылаах ыалдьыттары улуус баһылыгын солбуйааччы Егор Протопопов, улуустааҕы үөрэх управлениетын салайааччыта Мария Игнатьева истиҥник эҕэрдэлээтилэр.
Бүгүҥҥү Саҥа дьыллааҕы бырааһынньыкка Егор Андреевич стипендиаттарга инникитин билии, сайдыы үрдүк кирбиилэрин ыла туралларыгар баҕаран туран, улуус оскуолаларыттан, эбии үөрэхтээһин тэрилтэлэриттэн үөрэххэ, олимпиадаларга, конференцияларга ситиһиилээхтик кыттыбыт 16, култуура, искусство эйгэтигэр үрдүк көрдөрүүлэммит 13 үөрэнээччигэ бириэмийэлэри туттарда, төрөппүттэри Махтал суруктарынан бэлиэтээтэ.
Кини ыксаллаах быһыыга өмүттүбэккэ, кыһыҥҥы тымныыга кыра оҕону быыһыыр хорсун быһыытын көрдөрбүт Е.М. Шапошников аатынан Хамаҕатта орто оскуолатын 6 кылааһын үөрэнээччитигэр Сандал Новгородовка улуус баһылыгын Махтал суругун дохсун ытыс тыаһыгар доҕуһуоллатан туттарда. Оҕолорго үтүө быһыы холобурун тутуһалларыгар баҕарда, төрөппүттэргэ, учууталларга махтанна. Уолуйбат, күүстээх санаалаах оҕолор бааллара киһини астыннарар. Күннээҕи олоххо итинник быһыы дьиэҕэ-уокка, үөрэх тэрилтэтигэр иитии-үөрэтии сөптөөхтүк ыытылларын туоһулуур.
Үөрэх управлениетын салайааччыта Мария Семеновна бары стипендиаттарга мэлдьи билиилэрин-көрүүлэрин хаҥатан, үүнэн-сайдан, үрдүк үктэлгэ дабайалларыгар баҕаран туран, “Молодые прфессионалы” национальнай чемпионакка таһыччы көрдөрүүлэммит, оҕо хамсааһынын тэрээһиннэригэр ситиһиилээхтик кыттыбыт 6 оҕоҕо, патриотическай иитии, спорт, техническэй хайысха тэрээһиннэрин 14 бастыҥнарыгар, спортка кыайыы өрөгөйүн билбит 12 чулуу спортсмен оҕоҕо бириэмийэлэри, төрөпүттэргэ Махтал суруктары туттарда. Кини СӨ Ил Дархана үүнэр 2025 с. Аҕа дойдуну көмүскээччилэрин Сылынан биллэрбитинэн, үөрэҕи, билиини баһылаан, төрөөбүт улууспут, өрөспүүбүлүкэбит, дойдубут чэлгийэ сайдарыгар бэлэмнээх, ситиһиилээх, патриот дьон буолан тахсалларыгар баҕа санаатын тиэртэ.
Моруос оҕонньор Хаарчаанатынаан оҕолору, ыалдьыттары үүнэн эрэр Саҥа 2025 сылынан эҕэрдэлээтилэр, оҕолорго өссө элбэх ситиһиилэри, кыайыылары, умнуллубат түгэннэри баҕардылар. Сүүйүү оонньуутугар бааттаах үөрэнээччилэри, төрөппүттэри бириистэринэн бэлиэтээтилэр.
Саҥа дьыллааҕы харыйа бырааһынньыгын З.П. Винокуров аатынан Намнааҕы оҕо искусствотын оскуолатын “Ручеек” көрдөрүүлээх үҥкүү ансаамбыла, Нам улуустааҕы гимназиятын “Дьулусхан” этно-фольклорнай бөлөх, биллиилээх фокусник-иллюзионист Алексей Гольдеров, эдэр ырыаһыт Серж, “Кыһын Саха сириттэн саҕаланар-2024” өрөспүүбүлүкэтээҕи куонкурус-фестиваль кыайыылааҕа, Нам 1 №-дээх орто оскуола “Айар Куо” студия, оҕо хамсааһынын бастыҥнара И.Е. Винокуров аатынан Хатыҥ Арыы орто оскуолатын “Ылдьаа ыччаттара” түмсүү, Н.С. Охлопков аатынан НУГ “Стремление” үҥкүү ансамбыла бэйэлэрин нүөмэрдэринэн киэргэттилэр.
Улуус баһылыгын “Эҥсиэли эрэлэ” Саҥа дьыллааҕы харыйатын бырааһынньыга өрө көтөҕүллүүлээхтик буолан ааста. Үөрэнээччилэри 2025 с. саҥа кыайыыларга кынаттыы, саҥа ситиһиилэргэ сирдии, үрдүккэ угуйа, тырымныы, саҥа ааттары дорҕоонноохтук дуораһытар соруктаах түмүктэннэ.
Касьян Олесов-Олук