Устудьуон күнүнэн, тохсунньу 22-26 күннэригэр, Бүтүн Россиятааҕы «Студенческий десант» акция чэрчитининэн, Нам улууһун ис дьыала отделын уонна общественнай түмсүүлэриттэн кыттыылаах Намнааҕы педагогическай колледж устудьуоннарын кытта көрсүһүү ыытылынна.
Бу тэрээһиҥҥэ Намнааҕы ис дьыала отделын начальнигын солбуйааччы, личнай састаабы кытта үлэлэһэр группа салайааччыта Розалия Сидорова, Намнааҕы ИДьО полиция общественнай сэбиэтин председателэ Анна Кутукова, “Хатыҥ Арыы нэһилиэгэ” МТ дьаһалтатын сүрүннүүр специалиһа, саастарын ситэ илик оҕолору кытта үлэлэһэр общественнай сэбиэт секретара, ДНД чилиэнэ Надежда Сивцева, Намнааҕы техникум маастар педагога, ДНД командира Мичил Герасимов колледж 72 устудьуонугар полиция, ДНД уонна общественнай сэбиэт үлэлэрин сырдаттылар, кэпсээтилэр. Кэпсэтии кэнниттэн устудьуоннартан киирбит ыйытыыларга эппиэттээтилэр.
***
Тохсунньу 25 күнүгэр, Хатыҥ Арыы нэһилиэгин олохтоох дьаһалтатыгар, «Хотой» ДНД 2023 сылга ыыппыт үлэтин отчуота буолан ааста. Хамандыыр Мичил Герасимов 2023 сылга дружинниктар туох үлэни ыыппыттарын сиһилии кэпсээтэ. Ол курдук, сыл устата араас сэрэтэр-харыстыыр рейдэлэр, нэһилиэк, улуус, өрөспүүбүлүкэ таһымнаах тэрээһиннэргэ бэрээдэги көрүү, халаан уута кэлиитигэр, кус булдун кэмигэр дьуһуурустуба, саас, сайын оҕолорго ууттан сэрэхтээх буолуу туһунан бэсиэдэ ыытыы, профилактика тематыгар сэрэтэр, өйдөтөр листовкалары тарҕатыы о.д.а үгүс үлэ ситимнээхтик барбыта бэлиэтэннэ.
Намнааҕы ис дьыала отделын начальнига, полиция подполковнига Михаил Кокарев бастыҥ үлэлээх дружиннактарга отдел аатыттан Мичил Герасимовка, Надежда Сивцеваҕа, Дмитрий Кривошапкиҥҥа грамота туттарда. Владимир Власовка, Саргылана Сметанинаҕа, Леонид Чупровка, Никита Килбясовка, Тимур Винокуровка махтал суруктары анаталаата. «Нам улууһа» МТ баһылыгын Юрий Слепцов махтал суругун Мичил Герасимов, Надежда Сивцева, Леонид Чупров үөрүлээх быһыыга-майгыга туттулар.
«Хатыҥ Арыы нэһилиэгэ» МТ баһылыгын солбуйааччы Герман Марков нэһилиэк участковай инспиэктэригэр Анатолий Герасимовка, көхтөөх дружиннактарга: Гаврил Макаровка, Григорий Пермяковка, Кирияна Корякинаҕа, Леонид Соловьевка, Владимир Оконешниковка, Сергей Парниковка, Туйара Винокуроваҕа, Айталина Винокуроваҕа, Петр Охлопковка, Мария Кузьминаҕа, Андриан Протопоповка махтал сурук туттарда.
2024 сылга дружинниктар үлэлэрин-хамнастарын тула дириҥ ис хоһоонноох кэпсэтии буолла. Ол курдук, дружинник күнүн бэлиэтиири, видеоролик устуутун, саҥа дружиннактары састаапка киллэриини, сааһын ситэ илик оҕолорго бэсиэдэ ыытары, өр сылларга үлэлээбит дружинниктарга улуус, ИДЬМ нөҥүө наҕараадалыыры, чэпчэтиилэри олохтууру о.д.а. торумнаатылар. 2024 сылга «Хотойдор» күргүөмүнэн бары бииргэ үлэлииргэ бэлэмнэр.
Надежда Сивцева