Хамаҕатта нэһилиэгин олохтоохторо «Экосети» тэрилтэ бөҕү бириэмэтигэр тиэйбэтиттэн айманаллар. Көрүөхтэн сүөргү хартыыналар нэһилиэк тас көстүүтүн буортулуулларын таһынан, санитарнай өттүнэн сэрэхтээҕиттэн дьиксинэллэр. Бөх хараллыбат, харчы хомуллар диэн абараллар.
Бүгүн «Кытыл» түөлбэ хоту төбөтүн олохтоохторо бөх дьааһыгын тула тыалга-кууска көппүт, таһынан баран ыһыллыбыт бөҕү субуотунньуктаан ыраастаатылар. Барыта 17 киһи кэлэн күргүөмнээхтик үлэлээн начаас өрө тартылар. Начальник Марфа Харитонова үлэлээбит дьонугар махтанар.
Бөҕү уматар, сыбаалкаҕа тиэйэр көҥүллэммэт, кытаанахтык бобуллар. Оттон бөх күн аайы тахсара биллэр, ол хараллара уустук кыһалҕа буолла. Бу кыһалҕа төрдүттэн быһаарылларыгар тустаах органнар, тэрилтэлэр үлэ ыыталларыгар уолдьаста диэн норуот туруорсар.
Мария Винокурова