Нам улууһугар боксаҕа “Моруос Оҕонньор” бирииһигэр оскуола оҕолоругар бастыыр иһин күрэхтэһиигэ 70 оҕо кыттыыны ылбыт.
Наммыт улууһун оҕолоругар үгүс көрүҥҥэ сыл аайы “Моруос Оҕонньор” бирииһигэр күрэхтэһии үтүө үгэскэ ыытыллар буолла. Ол курдук, улууска боксанан дьарыктанааччы оҕолор 22 ыйааһыҥҥа көрсүбүттэр уонна иккилии көрсүһүү оҥорбуттар. Бэлиэтээн эттэххэ, боксаҕа улууспутугар бэрт ахсааннаах күрэхтэһии буолар.
Миэстэлэспит оҕолор бука бары бэлэх ылан үөрүүлэрэ үксүүр. Ону таһынан, 11 кубок, “Фудмания” кафе 1, 500 солк. икки 1,000 солк. суумалаах сертификаттары спонсордаабыт. Оттон Владимир Слепцов күрэхтэһиигэ үс бириис туруорбут.
Риингэҕэ эдэр боксердар хамсаныыларын көрөннөр астыныы, үөрүү бэлиэтэ баара этиллэр. Бокса күрэхтэһиитин Хамаҕаттаттан Николай Иванов, Үөдэйтэн Захар Румянцев, Модуттан Махир Гадимов, Партизантан Гаврил Терентьев, Намтан Дмитрий Черноградскай уонна Дмитрий Захаров иитиллээччилэрэ киэргэппиттэр.
“Боксаҕа улууска бастыыр иһин күрэхтэһиини оҥорорбутугар күүс-көмө буолбут Нам улууһугар боксаҕа федерациятын председателэ Василий Кириллин, “Лидер” спорт киин салайааччыта Иван Яковлев, улуустааҕы “Олимпик” спорт оскуолаҕа, ветеран-боксердарга, судьуйалааһыҥҥа көмөлөспүттэргэ тэрийэр комитет аатыттан улахан махталбытын тиэрдэбит!
Төһө да үп-харчы өттүгэр ыктарыылаах сыл буоллар, үлэ ситэриилээх, толору буоларыгар бэйэ икки ардыбытыгар биир тылы булуу хайаатар да наада. Баҕа санаа баар буоллаҕына, барыта кыаллар, табыллар, сатанар!
Кэлэн иһэр Саҥа дьыл бырааһынньыгынан эҕэрдэлиибит! Барыгытыгар баҕарабыт, кэлэр саҥа сылга элбэх ситиһиилэри, туйгун туругу, тус олоххутугар дьолу-соргуну!” – диэн санаатын этэр Гаврил Егорович.
Харысхан Попов