Кулун тутар 3 күнүгэр Хамаҕатта нэһилиэгин олохтооҕо, дуобакка, саахымакка дэгиттэр оонньооччу Прокопий Николаевич Сивцев 75 сааһыгар анаммыт бэтэрээннэр ортолоругар аһаҕас улуустааҕы «СаДуоБа» турнира тэрилиннэ. Дойдубутугар Дьиэ кэргэн сылынан үбүлүөйдээх турниры улуустааҕы дуобат Федерацията (сал. А.И. Винокуров) уонна П.Н. Сивцев дьиэ кэргэнэ көҕүлээн, Хамаҕатта нэһилиэгин Д.Д. Новгородов аатынан бэтэрээннэр «Кэскил» балаҕаннарыгар ыытылынна.
Турнирга улууспут нэһилиэктэриттэн, Дьокуускай куораттан, Мэҥэ Хаҥаластан барыта 31 кыттааччы регистрацияны ааһан, П.Н. Сивцев мөссүөннээх значоктары, анабыл тыллаах уруучукалары, Дьиэ кэргэн сылынан өйдөбүнньүк 2024 с. халандаары бэлэх туттулар.
Кылаабынай судьуйанан дуобат, саахымат спордун энтузиаһа Анатолий Матвеев, онтон секретарынан улуустааҕы «Олимпик» спортивнай оскуола дуобакка тренерэ Надежда Протопопова үлэлээтилэр. Швейцарскай систиэмэнэн 9 тур оонньонно. Бэтэрээн эр дьон, дьахталлар биир бөлөххө оонньоотулар. Сэрэбиэй көмпүүтэринэн оҥоһуллар буолан, күүстээх оонньооччулар хара ааныттан утарыта түбэстилэр. Састаап күүстээх, оонньуу саҕаланыаҕыттан сытыытык, эриһиилээхтик барда.
Турнир көрүҥнэринэн түмүгэ маннык буолла:
Саахымат: 1м. — Максим Попов (Нам), 2м. — Станислав Тоскин (Нам-Дьокуускай), 3м. — Роман Полищиков (Хамаҕатта). Дуобат: 1м. — Егор Леонтьев (Хамаҕатта), 2м. — Григорий Кычкин (Граф Биэрэгэ), 3 м. — Геннадий Яковлев (Партизан). Баарыс: 1м. — Ион Васильев (Модут), 2м. — Дмитрий Сыромятников-Кэрэһиннээх (Мэҥэ Хаҥалас), 3м. — Анатолий Эверстов (Бөтүҥ).
Үбүлүөйдээх турнир үс көрүҥүн холбоон дуобакка, саахымакка улуус күүстээх оонньооччута, 82-с хаарын уулларбыт Егор Леонтьев (Хамаҕатта) кыайыылаҕынан таҕыста. 2 миэстэҕэ Ион Васильев (Модут) тигистэ уонна табыллан оонньоон 3 миэстэни Анатолий Эверстов (Бөтүҥ) ылла. Мэҥэ Хаҥаласка, өрөспүүбүлүкэҕэ биллэр оонньооччу Дмитрий Сыромятников-Кэрэһиннээх 4м. таҕыста.
Тоҕус бэтэрээн дьахтар оонньообутуттан үс көрүҥүнэн 1м. — Розалия Егорова (Нам), 2м. — Галина Иванова (Нам), 3м. — Наталья Трифонова (Дьокуускай) тигистилэр, оттон Акулина Беляева (Дьокуускай) 4м. дуоһуйда.
Көрүҥнэринэн, уопсай түмүккэ кыайбыттар, бириистээх миэстэлэргэ тиксибиттэр уонна 4 м. тахсыбыттар бары үбүлүөйдээх П.Н. Сивцев дьиэ кэргэнин аатыттан грамоталарынан, мэтээллэринэн уонна кинилэр оҕолоро, аймахтара, нэһилиэк общественнай түмсүүлэрэ, ол иһигэрбиһиги, «Кырымахтар» аҕам саастаах эр дьон түмсүү, спонсордаан туруорбут сыаналаах бириистэринэн наҕараадаланнылар. Онон кыайыылаах Егор Романович убаһа аҥарын, иккис миэстэлээх Ион Ионович убаһа холун, үһүс миэстэлээх Анатолий Ефремович убаһа буутун, оттон төрдүс миэстэлээх Дмитрий Васильевич убаһа иһин ылар сертификаттары үбүлүөйдээх Прокопий Николаевич уонна кэргэнэ Мария Николаевна илиилэриттэн тутан үөрдүлэр.
Күрэхтэһии кыттыылаахтарын ортотугар турнирга үс көрүҥ түмүгүнэн ким кыайарын, бириистээх миэстэҕэ тиксэрин сылыктыыр тургутуу оонньуутугар кыайыылааҕынан Модуттан Дария Ивановна Ядрихинская тахсан, сыаналаах бирииһинэн бэлиэтэннэ. Бириистэр ботуччулар, ону туппут бэтэрээннэр бары да астыннылар.
Күрэхтэһии кылаабынай судьуйата Анатолий Матвеев эҕэрдэлээн туран, Прокопий Николаевичка «Нам улууһун спорка бочуоттаах бэтэрээнэ» түөскэ анньыллар бэлиэни, соторутааҕыта Дьокуускай куоракка ыытыллыбыт үһүс көлүөнэ оскуолатын улахан спортивнай түһүлгэтигэр Нам бэтэрээннэрэ кыайыыларыгар дуобакка хамаанданан бастаан кылааттарын киллэрбит Е.Р. Леонтьевка, Р.Н. Егороваҕа харчынан бириэмийэлэрин туттарда.
—Биһиги дьиэ кэргэнинэн хардарыта истиҥник сыһыаннаспыппыт ыраатта. Бу маннык күрэхтэһии, сааһыттан тутулуга суох, киһи олоххо тардыһыытын күүһүрдэр, киһини эдэримситэр даҕаны. Төһө да өй оонньуутугар сылайдаргын, билэр-көрөр дьоҥҥун кытта алтыһаҕын, сэһэргэһэҕин, сэргэхсийэҕин. Онон Прокопий Николаевичка уонна Мария Николаевнаҕа махтанабын, бу турниры бэркэ тэрийбиккит, судьуйалааһын да үрдүк таһымҥа барда. Бука бары бэйэҕит уонна дьиэ кэргэттэргит этэҥҥэ буоллуннар. Кэрэҕэ тардыһыҥ, наар үчүгэйи эрэ ыраланыҥ, — диэн эҕэрдэлээтэ Мэҥэ Хаҥаластан кэлбит ыалдьыта, доҕоро Россия норуотун үөрэҕириитин туйгуна, СӨ физическэй культураҕа уонна спортка үтүөлээх үлэһитэ, «Дети-Саха Азия» Аан дойдутааҕы фондатын стипендиата, СӨ ХХ үйэ спортка лауреата, дуобакка Аан дойдутааҕы категориялаах арбитр, ФМЖД маастара, спорт бэтэрээнэ, Мэҥэ Хаҥалас улууһун бочуоттаах олохтооҕо Дмитрий Васильевич Сыромятников-Кэрэһиннээх уонна илдьэ кэлбит бэлэхтэрин утары уунна.
Ити курдук доҕотторо, бииргэ алтыһар бэтэрээн спортсменнара, Хамаҕатта нэһилиэгин общественнай түмсүүлэрин салайааччылара, оҕолоро, аймахтара үтүө-мааны тыллары эттилэр, сэмэй бэлэхтэри туттардылар, истиҥ ырыаларынан эҕэрдэлээтилэр. Мария Николаевна, Прокопий Николаевич турнирга кыттыбыт бэтэрээннэргэ, тэрээһиҥҥэ, ыытыыга көмөлөспүт дьүөгэлэригэр, доҕотторугар, оҕолоругар, чугас аймахтарыгар махтаннылар. Кылаабынай судьуйаҕа Анатолий Матвеевка, швейцарскай систиэмэнэн барар оонньууну көмпүүтэринэн кыайа-хото тутан ыытан секретардаабыт Надежда Протопоповаҕа сэмэй бэлэхтэрин туттардылар. Бары сэргэхсийэн, астынан тарҕастылар.
Касьян Олесов-Олук