Никольскай нэһилиэгэр XX-c үйэ чулуу сылгыһыта Иван Иннокентьевич Герасимов – Геракл аатынан «Байанай күрэҕэ-2024” быйыл иккис төгүлүн олус көхтөөхтүк ахсынньы 6 күнүгэр буолан ааста.
Күрэххэ үстүү киһилээх биэс хамаанда күөн көрүстүлэр. Никольскайтан «Дьулуур” уонна “Дьөһөгөй” диэн икки хамаанда, Хамаҕаттаттан биир, Модуттан биир уонна Нам улууһун тыатын хаһаайыстыбатын управлениетыттан биир хамаанда буолан күрэхтэстилэр.
Тэрээһиҥҥэ “Нам улууһа” МТ быһылыгын солбуйааччыта Николаев Филипп Васильевич, улуустааҕы булчуттар уонна балыксыттар уопсастыбаларын председателэ Яковлев Иван Васильевич, Нам улууһун айылҕа харыстабылын инспекциятын инспектора Эверстов Семен Иванович уонна Никольскай нэһилиэгин баһылыга Уйгу Сайаан уола эҕэрдэ тылларын эттилэр уонна ситиһиини, дьулууру баҕардылар.
Күрэхтэһии биэс түһүмэҕинэн барда. Бэйэни билиһиннэрии түһүмэххэ Модут хамаандата үрдүк таһаарыылаахтык кыттан, көрөөччүлэри уонна дьүүллүүр сүбэни сөхтөрөн, үрдүк баалы ыллылар. Ойбон алларыытын түһүмэҕэр уолаттар сытыы анньыыларынан күүстээхтик түһүннүлэр, бу күрэххэ Никольскай “Дьулуур” хамаандата кыайда. Салгыы өйү тургутар күрэххэ күөн көрүстүлэр, манна Никольскай “Дьулуур” хамаандата үрдүк баалы ылла. Кэлэр түһүмэхэ – сыал ытыытыгар Никольскай “Дьулуур” хамаандата кыайда. Хас биирдии хамаанда бэйэлэрин бултарыттан, Байанайдарын бэлэҕиттэн бүлүүдэ буһаран аҕалан көрдөрдүлэр, бу түһүмэххэ Модут хамаандата инники күөҥҥэ тахсан тэҥнээҕин булбата.
Хас да чаастаах, тыҥааһыннаах киирсии кэнниттэн Модут нэһилиэгэ үрдүк баалы ылан, 1 миэстэ өрөгөйүгэр тахсан үөрүү буоллулар. 2-с миэстэҕэ – Никольскай нэһилиэгиттэн «Дьулуур», 3-с бочуоттаах миэстэҕэ Хамаҕатта нэһилиэгин хамаандалара тигистилэр.
Тэрээһиҥҥэ булчут ыттар экстерьер быыстапкалара ыытылынна, уопсайа 26 ыт кытынна. Быыстапка кэмигэр Дьокуускайтан кэлбит ыт эксперэ Дмитрий Иванов улуус булчуттарын 4 көрүҥ боруода ыттарын: Илин Сибиир лайка (Восточносибирская лайка), Арҕаа Сибиир лайка (Западносибирская лайка), Саха ыта (Якутская охотничья лайка) уонна Чуоҕур ыт (Чубарая лайка) сыаналаан кыайыылаахтары быһаарда. Ол түмүгэр кыайыылааҕынанНикольскай нэһилиэгиттэн 5 саастаах Ыллык диэн ааттаах Арҕаа Сибиир лайката (Западносибирская лайка), хаһаайын Иннокентий Герасимов таҕыста.
Эксперт Дмитрий Олегович Иванов быыстапка кыттыылаахтарын барыларын эҕэрдэлээн туран, кыайыылаахтарга грамота уонна Иван Иннокентьевич Герасимов — Геракл бииргэ төрөөбүттэрэ туруорбут бириистэрин туттарда, ыттарга мэтээл кэтэртэ. Бэйэтин тус бэлэҕин STIHL бензопиланы Петр Карлович Парниковка (Саха ыта) туттарда.
Хас сылын аайы нэһилиэккэ ыытыллар “Байанай күрэҕэ” норуокка элбэх интэриэһи үөскэттэ, булчуттар чахчы долгуйа кэтэһэр бырааһынньыктарынан буолла.
Василиса Ларионова, Никольскай