Буулдьанан ытыы бэриниилээхтэрэ күөн көрсүөхтэрэ

Намҥа култуура-спорт комплексыгар тохсунньу 18 күнүгэр 10 чаастан буулдьанан ытыы буолуоҕа. “Манчаары оонньуулара” спартакиадаҕа барар, бэлэмнэнэр инниттэн улууспут кыраҕы харахтаахтара, бэргэн ытааччылара хаачыстыбаларын тупсарыахтара, сааларын тургутуохтара.

Буолаары турар күрэхтэһиигэ ордук интэриэстээхтэр, буулдьанан ытыы көрүҥэр бэриниилээхтэр “Белка-ВПп”, “Белка-ПС” түһүмэхтэргэ күрэхтэһиэхтэрэ. Чопчулаатахха, маннык күрэхтэһиилэртэн спортсмен сатабыла үрдүүр, таһымнаах киирсиилэргэ эрэллээх киирэр.

“Белка-ВПп” түһүмэххэ хамаандаттан 3 киһи ыппытыттан чаҕылхай көрдөрүүлээх түмүгү ылыахтара. Оттон “Белка-ПС” ытыыга хамаандаттан оҕо, дьахтар, эр киһи, бэтэрээн-дьахтар, бэтэрээн-эр киһи бөлөҕүттэн тахсаннар ытыахтара.

“Буулдьанан ытыы күрэхтэһиитигэр чопчу Ленскэй нэһилиэк, Хатыҥ Арыы, 1 Хомустаах, Модут спортсменнара кыттыыны ылыахтара. 2 Хомустаах уонна Хатырык нэһилиэктэрэ хамаандаларын толорон кыттар баҕа санаалаахтар.

Бүгүҥҥү күҥҥэ төһө да буулдьанан ытар көрүҥүнэн дьарыктаныаххын баҕарбытын иһин, туох барыта ыараан турар. Холобура, биир хаа судургу ботуруон сыаната 700 солк. тэҥнэһэр. Оттон үрдүк хаачыстыбалааҕын 2800 солк. буолар”, – диир буулдьанан ытыыга кылаабынай судьуйа Күннэй Эверстова.

Харысхан Попов

Читайте дальше