“Азия оҕолоро” 8-с аан дойдутааҕы спортивнай оонньуулар саҕаланнылар. Онон сибээстээн биһиги улууспутуттан, нэһилиэкпититтэн кыттыыны ылбыт оҕолору кэпсээтэххэ, Хамаҕатта нэһилиэгиттэн төрүттээх Чаара Иванова 2012 сыллаахха V-с “Азия оҕолоро” оонньууга кыттыбыта. Ол кэм туһунан билигин маннык ахтар:
—Бастакы Президеммыт Михаил Николаев көҕүлээһининэн бастакы оонньуу 1996 с. ыытыллыбыта. Бу азия араас дойдуларыттан күүстээхтэн күустээх, быһыйтан быһый күөн көрсүһэр түһүлгэлэрэ, оҕо-аймах бырааһынньыга дии саныыбын. Бастаан 7 көрүҥҥэ күрэхтэһэр буоллахтарына, оонньууттан оонньууга көрүҥ элбээн иһэр.
Мин ол саҕана Тыыллыма спортивнай оскуолатыгар үерэнэрим, буулдьанан ытыынан дьарыктанарым. Тренерим Семен Васильевич Костромыкин спорка суолу тэлбитигэр махтанабын.
Намтан 10 оҕо кыттыбытын билэбин. Олор истэригэр тустууктар Колотова Зоя, Григорьев Аркадий, Парникова Анджела, Хамаҕаттаттан Ньургуйаана Тимофеева уо.д.а. бааллара.
Саамай умнуллубат түгэнинэн оонньуу үөрүүлээх аһыллыытыгар 7 омук оҕотун кытта былаах киллэриитэ этэ.
Спордунан дьарыктанар оҕолорго баҕа санаам: Хас биирдии спортсмеҥҥа былаан баар буолуон наада уонна мин тулуурдаахпын, мин эрэллээхпин диэн сыал туруорунан ситиһиини, кыайыыны! Көрүҥнэригэр бары мэтээл аҕалалларыгар баҕарабын.
Билигин Чаара Намнааҕы ис дьыала уорганын үлэһитэ, 8-с оонньууларга патрульнай службаҕа киирэн, бэрээдэги хааччыйар.
Маргарита Охлопкова