Нам сэлиэнньэтигэр социальнай балаһыанньалара кутталлаах дьиэ кэргэн учуотугар турар ийэлэр оҕолорун көрбөккө, арыгыны батыһан баран хаалар түгэннэрэ тахсыталыы турар.
Ол курдук, Намҥа ааспыт нэдиэлэҕэ 2 ыал оҕолоро төрөппүт көрүүтэ суох хааланнар, “Берегиня” Намнааҕы киин филиалыгар киирдилэр.
Нам сэлиэнньэтигэр от ыйын 5 уонна 12 күннэригэр Ленскэй нэһилиэк олохтоох дьаһалтатын иһинэн үлэлиир сокуоннай саастарын туола илик оҕолор дьыалаларыгар уонна бырааптарын көмүскүүр уопсастыбаннай сэбиэт көҕүлээһининэн, “Берегиня” Намнааҕы киин филиалын социальнай педагогтара уонна ПДН инспектора кыттыылаах рейдэлэр буоллулар.
Барыта 27 ыалтан 5 ыал ийэтэ арыгы, итирдэр утахтары иһэрэ билиннэ. Өйдөтүү үлэтэ ыытыллыбытын түмүгэр, үс ийэ Намнааҕы киин балыыһа наркологическай кабинетыгар эмтэнэ барыахпыт этэ диэн көмөҕө наадыйаллара этиллэр.
Оҕо туһугар аһыы утахтан аккаастаҥ! Кэнчээри ыччаппытыгар, олоҕу салҕааччыларбытыгар дьоллоох оҕо сааһы бэлэхтиэххэ, улахан дьон олоҕор бэлэмнээх дьону иитэн таһаарыахха!
Харысхан Попов