Ил Дархан Айсен Николаев «Азия оҕолоро» Норуоттар икки ардыларынааҕы VIII спортивнай оонньуулар аан дойду үрдүнэн быйылгы сылга саамай улахан оҕо күрэхтэһиитэ буолар диэн эппитэ.
Бүгүн кэтэһиилээх үөрүүлээх аһыллыытыгар «Туймаада» стадиоҥҥа «Азия оҕолоро» спорт оонньуута саҕаламмыт бэлиэ уотун уматыахтара. Тэрээһиҥҥэ өрөспүүбүлүкэ 24 улууһуттан уонна Дьокуускайтан уопсайа 58 коллектив кыттыыны ылыаҕа. Историяҕа хаалар Саха сирин туһунан киэҥ хабааннаах көрдөрүү буолуоҕа. Нам улууһуттан культурнай-маассабай тэрээһиннэргэ 154 оҕо кыттыыны ылар. Кинилэр ортолоругар Намнааҕы З.П. Винокуров аатынан оҕо искусствотын оскуолатын Партизаннааҕы филиалыттан «Сандаара» оҕо үҥкүү ансаамбылын оҕолоро үөрэ-көтө, астына кыттыыны ылаллар.
Алексей Дьячковский, «Сандаара» ансаамбыл салайааччыта: «Бэс ыйын 12 күнүттэн «Сосновый бор» оҕо сынньалаҥ киинигэр олохсуйан, «Азия оҕолоро» Норуоттар икки ардыларынааҕы VIII спортивнай оонньуулар үөрүүлээх аһыллыытыгар кыттарга бэлэмнэннибит. Маннык аан дойдутааҕы таһымнаах тэрээһиҥҥэ 21 оҕом кыттар. Оҕолор бэлэмнэниигэ үөрэ-көтө сырыттылар, бүгүн саамай эппиэтинэстээх күммүт үүннэ. Бэҕэһээ бүтэһиктээх бэлэмнэниигэ бэркэ кытыннылар. Салгыы 14 оҕо спортивнай оонньууну түмүктүүр тэрээһиҥҥэ кытта хаалыахтара».
«Азия оҕолоро» Норуоттар икки ардыларынааҕы спортивнай оонньуулары аһыы сүрүн тематынан Арктика буолар. Бүгүн киэһэ 7 чаастан көрөөччүлэри үс чаастаах программа күүтэр. Вокальнай уонна хореографическай нүөмэрдэри, ону тэҥэ биллэр артыыстар толорууларын көрүөхтэрэ.
Онньуу саҕаламмытын туоһулуур үөрүүлээх аһыллыыга Россия спордун министрэ Михаил Дегтярев, Ил Дархан Айсен Николаев, «Азия оҕолоро» норуоттар икки ардыларынааҕы комитетын президенэ Владимир Максимов, Россия Олимпийскай комитетын президенэ Станислав Поздняков, Беларусь өрөспүүбүлүкэтин национальнай Олимпийскай кэмитиэтин президенэ Виктор Лукашенко, спортка уонна туризмҥа министрэ Сергей Ковальчук кыттыыны ылыахтара.
Семен Аргунов