Бүттүүн нэһилиэнньэ күүс-көмө буолар

Нам улууһугар Санкт-Петербурга балыыһаҕа эмтэнэ сытар байыастарга бэйэ аһын тиэрдэргэ акция биллэриллибитэ. Тэрилтэлэр акцияҕа кыттыһан саҕалаабыттарын тэҥэ, улуус үтүө сүрэхтээхтэрэ номнуо, ынах, убаһа этин тиэрдибитинэн бардылар.

Улуустааҕы дьаһалта дьиэтигэр Вера Васильевна, Дмитрий Николаевич Поповтар дьиэ кэргэн 5 кг ынах, 5 кг убаһа этин аҕалан туттардылар. Поповтар 20 сыл устата көмөҕө наадыйбыкка бэйэлэрин көмөлөрүн оҥорон кэллилэр. Ол курдук, уһун сыллар усталара биир акцияны көтүппэтэх ыал көмөлөһөрө – ыал аҕата уонна ийэтэ биир тылы буларыттан, ис дууһалара бэйэ-бэйэлэригэр сөп түбэһэрэ, амарах санааларын туоһулуур.

“Кырыа кыһыннаах тымныы сиргэ олохсуйбут саха дьоно былыр-былыргыттан бэйэлэригэр күүс-көмө буоланнар баччаҕа диэри тиийэн кэллэхтэрэ. Биһиги дьиэ кэргэн көмөҕө наадыйар дьоҥҥо илиибитин утары уунан көмөлөһөрбүтүн ис-испититтэн сөбүлүүбүт.

Акцияҕа хас биирдии үлэлээх-хамнастаах киһи күүс-көмө буолуохтара диэн биһиги дьиэ кэргэн эрэнэбит”, – диир өр сылларга уопсастыбаны кытта үлэлээбит, үгүс түмсүүлэри салайбыт Вера Васильевна.

Көмөлөһүөн баҕалаахтар сиһилии 8-924-462-64-47 (Матрена Ильинична) нүөмэргэ эрийэн билсиэххитин сөп.

Харысхан Попов

Читайте дальше