Дойдубут Президенин талар олус эппиэтинэстээх быыбарга бэлэмнэнии үлэтэ элбэх уратылардаах. Нам улууһун Хамаҕаттатааҕы 334 N-дээх быыбардыыр учаастак председателэ Антонина Харитонова иһитиннэрбитинэн, олунньу 17 күнүттэн «Информ УИК» федеральнай бырайыак үлэтэ саҕаланан кулун тутар 7 күнүгэр түмүктэниэхтээх.
Бу күннэргэ комиссия чилиэннэрэ Анна Аргунова, Лена Канаева, Нина Харитонова, Татьяна Уодай түөлбэлэринэн сылдьан быыбар үлэтин хаамыытын билиһиннэрэр, информацияны тиэрдэр, быыбардааччылар испиэһэктэрин чуолкайдыыр сыаллаах хас биирдии дьиэнэн кэрийэ сылдьаллар. Барыта 495 дьиэни хабан, быыбардааччылары мобильнай «Модуль А» программаҕа бэлиэтээн иһэллэр.
— УИК чилиэннэригэр анал накидка, суумка, планшет, бэйдж биэрбиттэрэ. Быыбардыыр учаастакпытыгар видеокамера туруордулар. Испиэһэкпитин кулун тутар 5 күнүгэр ыллыбыт, 1347 киһи диэн сурулла сылдьар.
Быыбар биир уратыта быыбардааччы сайабылыанньа биэрэн кини быыбар күннэригэр ханна баар сиригэр быыбардыыр бырааптааҕа буолар. Аны куоластааһын үс күн буолара аан бастаан киирэр. Кулун тутар 15,16,17 күннэригэр быыбардааччыларбытын көхтөөхтүк кыттыахтара диэн эрэнэ күүтэбит, — диир Антонина Харитонова.
Мария Винокурова