Бэс ыйын 7 күнүгэр, Хомустаах Бастакы нэһилиэгэр » Дьахтар олоҕу түстүүр», диэн ааттаах дьахталлар хамсааһыннарын, кинилэр олохторун историятын толору көрдөрөр бэртээхэй кинигэ таҕыста.
Бу кинигэ лоп курдук оруобуна Бастакы Хомустаахха Дьахтар сэбиэтэ тэриллэн үлэлээбитэ 65 сылын туолуутугар кэрэ бэлэх буолла. Кинигэҕэ
дьиэ кэргэн дьоллоох олоҕун, сиэрин- майгытын, оҕо-уруу инники күөҥҥэ тутуллуутун, алаһа дьиэ амарах ийэтэ иилээн-саҕалаан тугу үлэлээбитэ арылыччы көстөр. Манна элбэх талааннаах, олоххо бэриниилээх, дьон олоҕо тупсарын туһугар бэйэ бириэмэтин харыстаабакка үлэлиир дьахталлар тустарынан элбэҕи булан ааҕыахха сөп.
Кинигэ 4 түһүмэхтэн турар:
l түһүмэх -Дьахталлар хамсааһыннарын историята
II түһүмэх — Элбэх оҕолоох күн күбэй ийэлэр
lll түһүмэх — Сэбиэскэй тыыҥҥа иитиллэн — инники күөҥҥэ
IV түһүмэх — Нэһилиэкпит улууспут сайдарын туһугар.
Кинигэни арыйан ааҕа олордоххо нэһилиэккэ дьахталлар тугунан тыынан, хамсаан олорбуттара, күннээҕи олохторун хаамыыта арылыччы көстөр, онуоха билигин да, кэлэр да ыччыкка бу кинигэ бэртээхэй справочник курдук көмө буолар эбит диэн бэлиэтии көрүөххэ сөп.
Кинигэни иилээн -саҕалаан, хомуйан, бэчээккэ бэлэмнээбит дьонунан буолаллар Татьяна Березкина, Людмила Степанова, Лариса Сивцева, редакционнай сүбэһиттэринэн үлэлээтилэр Людмила Степанова, Лариса Сивцева, Галина Ядреева, Алена Томская, Мария Сысолятина. Кинигэ 479 страницалаах 200 экземплярынан бэчээттэнэн күн сирин көрдө.
Лена Корякина