Партизан нэһилиэгин дьаһалтата дойдуга Дьиэ кэргэн сылынан «Тиэргэн-2024» диэн дьиэ таһын, тиэргэни киэргэтии күрэҕин биллэрэн, Ороһуоспа күн түмүк таһаарда.
Күрэххэ дьиэ таһын уотунан-күөһүнэн киэргэтии, муус-хаар оҥоһуктар, уоттаах лаглайбыт күөх харыйа уо.д.а киирдилэр. Кыттааччылар тиэргэннэрин видеоҕа устан тохсунньу 6 күнүгэр диэри ыыттылар. Оттон тиэргэни көрүү комиссията ыалынан сылдьан түмүгү таһаарда.
Биһиги нэһилиэкпит биир киэн туттар улахан, түмсүүлээх, иллээх дьиэ кэргэнэ, 13 бииргэ төрөөбүт Неустроевтар ааттарыттан, аҕаларын Пётр Алексеевич, ийэлэрин Марина Егоровна ааттарын үйэтитэн, ааттатан таптыыр Бартыһааннарын дьиэ кэргэттэригэр күрэх кыайыылаахтарыгар сыаналаах бириистэри туруордулар. Улахан дьиэ кэргэн кэскиллээх дьыалата нэһилиэкпит дьиэ кэргэттэригэр үтүө холобур буолар.
Таптыыр нэһилиэкпит тас көстүүтэ тупсарыгар, дьоммут-сэргэбит көхтөөхтүк кытыннылар. Уопсайа 6 тиэргэн кытынна.
Кырдьыга, бииртэн биир үчүгэй оҥоһуктар баар буолбуттар. Дьүүллүүр сүбэҕэ олус ыарахан буолла дииллэр — Неустроевтар дьиэ кэргэттэрэ. Кинилэр 6 дьиэ кэргэҥҥэ барыларыгар бириис биэрэн үөртүлэр.
Урут ийэлэрэ Марина Егоровна ыалларын, Школьнай уулуусса оҕолорун ыҥыран утренник тэрийэр, бэлэх биэртэлиир эбит. Бэйэлэрэ да элбэх оҕолоох, икки огдообо холбоһон, кэнники оссо оҕолонон бииргэ төрөөбүттэр уопсайа 13-тэр.
«Тиэргэн-2024» түмүгэ маннык буолла: үһүс миэстэни — Анисия Христофорова, иккис миэстэни — Александра Атласова, өрөгөй маҥнайгы миэстэни Наталья Иванова ыллылар.
Махтал буоллун Неустроевтар дьиэ кэргэттэригэр!
Полина Скрябина