Горнай улууһун Одуну нэһилиэгин «Арчы» ветераннар түмсүүлэрин сэбиэтэ (сал. Никанорова О.Р) Түбэ нэһилиэгэр кэлэн ыалдьыттаан бардылар. Түбэ нэһилиэгин баһылыга Гуляев Н.В. салайааччылаах Түбэ пенсионердара ыалдьыттары нэһилиэк кыраныыссатыгар алаадьынан айах тутан көрүстүлэр.
Ыалдьыттарбыт ыллам ырыа кэһиилээх, нэһилиэктэрин кэпсиир кинигэ быыстапкалаах, «Хомуур куб» оонньуулааах , сүүйүүлээх лотереялаах кэлэн көрсүһүүнү тупсаран биэрдилэр. Түбэлэр итии астаах, сылаас олбохтоох, коллекционердар быыстапкаларын тэрийэн көрүстүбүт. 78 саастаах Ытык киһибит Атласова С.В. баайыы үлэлэрэ, Корнилова С.Н. слоннара, Дьяконова А Е маркалара, конверт ойуулара, Дьяконова В.И. кыптыыйдара, Попова В.Н. ракушкалара, Куличкина Г.К. киндер оонньуурдара, Шарина Е.И. куукулалара , Сивцева М.П. гжель иһиттэрэ, Захарова О.А. момуоһунньуктара, Константинова С.И. урукку кинигэлэрэ, открыткалара, Лукина Р.Е. нэһилиэкпит историятын кэпсиир буклеттара сэҥээрини ыллылар. Ыччаттарбыт ааттарыттан Сардаана Аргунова ырыа бэлэхтээн тэрээһини арыйда.
Горнайдары кытта бу иккис көрсүһүү буолар, өссө тохсунньу ыйга Сивцева М.А. салайааччылаах «Собо музейа» Одунуга дьон-сэргэ көрүүтүгэр туран биһирэбили ылбыта. Манна Захарова О.А., Захарова А.Д. нэһилиэкпит үлэтин олоҕун билиһиннэрбиттэр уонна түөлбэбитигэр ыалдьыттыы кэлэллэригэр ыҥырбыппыт. Ольга Романовна бэрт киэҥник нэһилиэгин, ветераннар үлэлэрин кэпсээтэ, үгүс кинигэлэрин ырытан көрдөрдө. Түбэлэртэн Аҕа баһылыкпыт Гуляев Г.В. эҕэрдэлээн, икки улуус нэһилиэктэрэ бииргэ үлэлээһиннэрин биһириирин эттэ уонна көмөтүн эрэннэрдэ.
М.А. Сивцева, Түбэ