Ааспыт нэдиэлэҕэ «Нам улууһа» МТ дьаһалтатын актовай саалатыгар ыытыллыбыт сүбэ мунньахха тэрилтэлэр салайааччылара уонна бэрэстэбиитэллэрэ ааспыт нэдиэлэҕэ Арассыыйа Сэбилэниилээх күүстэригэр баҕа өттүнэн хантараагынан сулууспалыы барыыга нэһилиэнньэ ортотугар ыыппыт үлэлэрин иһитиннэрдилэр.
Нам улуустааҕы киин балыыһа кылаабынай бырааһа Ариан Сергеев баҕалаах эдэр киһини кытта хантараагынан сулууспалыы барыыга сөбүлэҥ түһэрсибиттэрин уонна сулууспата бүттэҕинэ киин балыыһа техническэй персоналыгар киниэхэ үлэ миэстэтэ хааччылларын туһунан кэпсэппиттэрин иһитиннэрдэ.
«Эрэл» ТХПК салайааччыта Ньургун Гуляев, Намнааҕы ветеринарнай управление начальнига Прокопий Окоемов эдэр дьону кытта хантараагынан сулууспалыы барыыга кэпсэтиһиилэрэ түмүктэнэн эрэрин билиһиннэрдилэр. «НКТЭ» АО кылаабынай инженерэ Алексей Тихонов тэрилтэлэриттэн сулууспалыы барбыттарын эттэ. Атын cалайааччылар бары өйдөтөр үлэни тиһигин быспакка ыыталларын бэлиэтээтилэр.
Нэһилиэнньэҕэ сырдатыы өттүгэр улуустааҕы «Эҥсиэли» хаһыат, улуус дьаһалтатын пресс-киинэ ааспыт нэдиэлэҕэ СВО-ҕа, хантараагынан сулууспаҕа анаммыт матырыйааллары ТГ-каналга, сайтка, социальнай ситимҥэ таһаарбыттарын, хаһыакка бэчээттээбиттэрин эттилэр.
Бу сүбэ мунньахха эдэр дьон Дьокуускай куоракка хантараагынан сулууспалыы барыыны сүрүннүүр пууҥҥа доруобуйаларын туругун бэрэбиэркэлэтэн, тургутар кэпсэтиини этэҥҥэ ааһан, элбэх докумуону толорон, бүтүн уопсай испииһэккэ Нам улууһуттан бараллара чуолкайдык учуоттаммыт эрэ буоллаҕына, хантараагынан сулууспалыы бараллара быһаарыллыбытынан ааҕыллара ахтылынна. Тэрилтэлэр салайааччыларыгар ону хонтуруолга ылаллара этилиннэ.
Улуус баһылыга Юрий Слепцов бары тэрилтэлэр бэйэлэрин сайтарыгар, ТГ-каналга хантараагынан сулууспалыы барыыга матырыйааллары таһааралларыгар, истиэндэлэригэр плакаттары иилэллэригэр, өйдөтөр үлэни күүһүрдэллэригэр ыйыылары оҥордо.
Касьян Олесов-Олук