Нам улууһун баһылыга Юрий Слепцов биһиги хаһыаппытыгар тахсар анал колонкатыгар маннык суруйбута:
-Сокуоннай саастарын ситэ илик оҕолору реабилитациялыыр Намнааҕы киин төрдүттэн уларыйан, «Берегиня» дьиэ кэргэҥҥэ иитиигэ көмө республикатааҕы киинин Намнааҕы салаата буолан үлэлии-хамныы олорор. Урукку кырдьаҕастар уонна инбэлииттэр интернат-дьиэлэригэр капитальнай өрөмүөн ыытылынна. Тэрилтэ бары өттүнэн хааччыллан, өрөмүөннэнэн сотору кэминэн дьиэ кэргэҥҥэ, оҕолорго аанын тэлэччи аһарга бэлэм. Ону таһынан ахсынньы 1 күнүттэн бу тэрилтэ иһигэр «Дьиэ кэргэҥҥэ элбэх өҥөлөөх киин» диэн пилотнай бырайыак үлэтин саҕалыаҕа. Маннык бырайыак республикаҕа биир бастакынан Нам, Чурапчы улуустарыгар уонна Дьокуускай куоракка үлэлиэҕэ. Дьиэ кэргэҥҥэ бары өттүнэн табыгастаах, наадалаах киин арыллан, элбэх туһаны, көмөнү оҥоруоҕа.
Ол курдук, ахсынньы 1 күнүгэр Нам сэлиэнньэтигэр «Берегиня» дьиэ кэргэҥҥэ иитиигэ көмө республикатааҕы киинин Намнааҕы салаатын дьиэтигэр элбэх хайысхалаах дьиэ кэргэн киинэ үөрүүлээх аһыллыыта буолбут. Бу туһунан «Нам улууһа» МТ пресс-сулууспата иһитиннэрэр.
Тэрээһиҥҥэ социальнай уонна үлэҕэ сыһыаннаһыы боппуруостарыгар Уһук Илиҥҥи конференция кыттыылаахтара кэлэн эҕэрдэлээн, уопут атастастаспыттар. СР үлэ уонна социальнай сайдыы министрэ Елена Волкова, улуус баһылыгын солбуйааччы Петр Абрамов, «Берегиня» дьиэ кэргэҥҥэ иитиигэ республикатааҕы көмө киинин директора Анастасия Дьяконова эҕэрдэ тылларын эппиттэр. Маннык киин олус наадалааҕын бэлиэтээбиттэр.
Бу кииҥҥэ дьиэ кэргэттэргэ, ол иһигэр олох араас очурдарыгар оҕустарбыт, ыарахан туруктаах олохтоох, эдэр, ону сэргэ анал байыаннай дьайыы кыттыылаахтарын дьиэ кэргэтэригэр биир кэлим социальнай көмө оҥоруохтара. Ханнык баҕарар оҕолоох ыал иитии боппуруостарыгар араас харгыстары, дьиэ кэргэҥҥэ өйдөспөт түгэни, олоҕор араас уустуктары көрсүбүт буоллаҕына, кииҥҥэ кэлэн үрдүк квалификациялаах специалистартан көмө ылыан сөп.
Бэлиэтээн эттэххэ, РФ Президенэ Владимир Путин кэлэр 2024 сылы дойдуга Дьиэ кэргэн сылынан биллэрбитэ. Бу быһаарыы дьиэ кэргэн сыаннастарын уонна дьиэ кэргэни көмүскүүр судаарыстыбаннай бэлиитикэни күүһүрдэр, тарҕатар туһуттан ылыллыбыт.
Элбэх өрүттээх, бары өттүнэн туһалаах киин аһыллыбыта улууска иллээх, дьоллоох дьиэ кэргэн элбии турарыгар сүҥкэн көмө буолуо диэн эрэнэбит.
Хаартыскалар: «Нам улууһа» МТ пресс-сулууспата