Быйыл Үөдэй нэһилиэгэ үһүс сылын түөлбэлэри (ТОС) өйүүр уопсастыбаннай бэйэни салайыныы хайысхатыгар Грант кыайыылаахтарын аатын ылан, түөлбэлэр икки ардыларыгар бырайыак күрэҕин ыытта.
Күрэххэ 1 түөлбэ, “Тэтим” ТОС “Создание и развитие общественных пространств” хайысхаҕа “Ёлка символ года” бырайыагынан кыайыылаах аатын ылан өрөспүүбүлүкэттэн 190 771,87, улуустан 83 125, нэһилиэк бюджетыттан 50 000 суума Грант ылан бырайыактарын олоххо киллэрдилэр.
Ол курдук, биир дойдулаахтарбыт сүүрүк спортсмен Яковлевтар ааттарынан Мини-пааркаҕа саҥа Күөх харыйаны ылан оҕолорго, улахан дьоҥҥо үөрүүнү бэлэхтээн ахсынньы 1 күнүгэр харыйа уота сандаарбыта. Маны таһынан, «Оҕолорго үөрүүнү бэлэхтиэх» аахсыйаҕа түөлбэҕэ олорор байыаннай дьайыы кыттыылаахтарын оҕолоругар сэмэй бэлэхтэри туттардылар.
Бырайыак чэрчитинэн “Күөх харыйаҕа бэйэ оҥоһук оонньуура”, “Лаглайбыт күөх харыйачаан” уонна “Креативнай хаар киһи” дьиэ кэргэн оҥоһуктарыгар күрэхтэр ыытыллан аастылар.
Күрэхтэр түмүктэринэн күөх харыйа оҥоһук күрэҕэр 1 м. Эрика уонна Наталья Эдуардовна Даниловалар, 2 м. Маргарита Васильевна уонна кырачаан сиэнэ Айхан Посельскайдар, 3 м. Тайаана Варламова уонна Ванесса Новгородова ыллылар. Кэрэ оҥоһуктар күндү бэлэх буолан нэһилиэк харыйатын киэргэтэ тураллар.
“Креативнай снеговик” күрэҕэр 1 м. элбэх оҕолоох Варвара, Радомир Гоголевтар, 2 м. Наталья Данилова, 3 м. Гульнара Черноградская дьиэ кэргэнэ бастыҥнарынан ааттаннылар. “Бэйэ оҥоһуйа Харыйа” күрэҕэр 1 м. Наталья Данилова, 2 м. Мария Охлопкова, 3 м. Гульнара Черноградская дьиэ кэргэттэрэ чаҕылхай оҥоһуктары аҕалан сыаналаах бириистэринэн наҕараадаланнылар.
Түөлбэ салайааччыта Александра Николаевна Лиханова уонна “Тэтим” ТОС көхтөөх хамаандата биир бастыҥ түөлбэ буолан, номнуо үһүс бырайыактарын олоххо киллэрэллэр. Дьон туһугар сүүрэр-көтөр, уопсастыбаннай хамсааһын үлэтигэр күүстэрин-кыахтарын уурар дьоммутугар махтанабыт.
Бырайыак үлэтэ өссө да салҕанар, оҕо-аймах, дьиэ кэргэн сынньанарыгар сырылыыр сыыр, каток баар буоларын эрэнэ күүтэбит.
Үөдэй, Екатерина Эверстова