Бүгүн Нам улуустааҕы киин балыыһа көһө сылдьар «Доруобуйа» мобильнай киинин эмтиир биригээдэтэ Нам улууһун дьаһалтатын сайаапкатынан миэстэтигэр тиийэн медицинскэй көрүүнү ыытта.
-Бу иккис сырыыбыт, ааспыкка 20 киһи көрдөрбүтэ, улуус баһылыга Юрий Иннокентьевич эмиэ. Кини үлэбитин көрөн-истэн хайҕаабыта, -диир фельдшер Радмила Местникова. Кини үөрэҕин үрдэтинэн быйыл М.К. Аммосов аатынан ХИФУ медицинскэй институтугар 3 курсу үөрэнэн бүтэрбит.
Улуус дьаһалтатыттан 22 киһи доруобуйатын туругун бэрэбиэркэлэннэ. Мобильнай киин биригээдэтэ тэрилтэ сайаапкатынан медицинэ өҥөтүн толорууга үлэһиттэр бириэмэлэрин кэмчилиир, поликлиникаҕа хос сырыы оҥоһуллубат. Ол олус табыгастаах. Медицина биригээдэтэ ааспыт сырыыга Намнааҕы РЭС тэрилтэтигэр 25 үлэһит доруобуйатын туругун көрбүтэ. Аны ханнык тэрилтэ ыҥырар эбитий?
Касьян Олесов-Олук