СӨ Ил Дархана Айсен Николаев Анал этиитигэр РФ президенэ Владимир Путин көҕүлээбит «Демография» национальнай бырайыага ситиһиилээхтик олоххо киирэрин, Нам улууһугар кырдьаҕастарга уонна инбэлииттэргэ анаммыт саҥа интернат-дьиэ тутуллубутун аҕынна.
Анастасия Заболоцкая, Татьяна Ядрихинская аатынан Намнааҕы социальнай-геронтологическай киин директора:
— Биһиги интернат-дьиэбитигэр, билиҥҥитэ, 54 киһи киирдэ, өссө да эбиллиэхтэрэ. Саҥа кэлбиттэр олус астыналлар “Рай”, “Остуоруйа дойдута” диэн саҥа аллайан сөхпүттэрин биллэрэллэр. Ол курдук, табыгастаах, таһыччы үрдүк усулуобуйалаах саҥа дьиэ тутулунна. Бу иннинэ 470 кв. м иэннээх дьиэҕэ үлэлээбит эбит буоллахпытына, билигин 4700-тэн тахса кв. м киирдибит. Үлэһиттэр ахсааннара 21-тэн 55 киһиэхэ тиийэ үүннэ. Анал специалистарынан хааччылынныбыт. Кырдьаҕастар үйэлэрэ уһуурун инниттэн доруобуйаларыгар улахан болҕомто ууруллар.
СӨ Ил Дархана Айсен Николаев инбэлииттэри тиэйэргэ, таһарга аналлаах массыына сертификатын бэлэхтээбитэ биһиги үлэбитигэр улахан көмөлөөх буолуоҕа. Бэлиэтээн эттэххэ, Айсен Сергеевич дьиэ тутуутун хаамыытын бэйэтинэн кэтээн, “АЭБ Капитал” 2 сыл 2 ый иһигэр үрдүк хаачыстыбалаахтык тутта. Бүтүн доруобуйа уонна кыһамньы кластера буола үүннүбүт. Бу үлэ барыта дойду президенин өйөбүлүнэн, СӨ Үлэ уонна социальнай сайдыы министиэристибэтин хонтуруолунан ыытылынна. Онон, биллэн турар, кырдьаҕастарга, инбэлииттэргэ болҕомто күүһүрбүтүн биһиги бэйэбит эппитинэн-хааммытынан биллибит.
Интернат-дьиэбит аата уларыйан “Татьяна Ядрихинская аатынан Намнааҕы социальнай-геронтологическай киин” диэн буолла. Татьяна Кондратьевна Нам улууһун патриот дьахталларыттан биирдэстэрэ, олоххо тулуур, дьулуур үрдүк холобурун туоһута. Кини 96 сааһыгар диэри дьоһун олоҕу олорбута. Онон дьиэбит бүтүн киин буола кэҥээбититтэн, өссө Татьяна Кондратьевна Ядрихинская аатын сүкпүтүттэн киэн туттабыт, дойдубут, республикабыт салалтатыгар махтанабыт.
Лена Ноговицына