Хатыҥ Арыы нэһилиэгэр бүгүн олус долгутуулаах, соһуччу үөрүүлээх күн үүннэ. Ол курдук, Арассыыйа Героя Алексей Неустроев киинэ түспүт сиригэр, Аппааны бөһүөлэгэр, кэлэн ыалдьыттаан барда.
Бастаан Нам сэлиэнньэтигэр локальнай сэрии кыттыылаахтарыгар анаммыт сквергэ Нам улууһун баһылыгын солбуйааччыта Филипп Николаев, «Хатыҥ Арыы нэһилиэк» МТ баһылыга Иван Ноговицын, Ленскэй нэһилиэк баһылыгын солбуйааччы Петр Владимиров, «Воин» общественнай түмсүү салайааччыта Павел Оконешников уонна локальнай сэрии кыттыылаахтара эҕэрдэ тыл эттилэр, сибэкки дьөрбөтүн паамытынньыкка уурдулар.
Салгыы Аппааны бөһүөлэгин Кыайыы скверигэр И.Е. Винокуров аатынан Хатыҥ Арыы орто оскуолатын алын кылаас үөрэнээччилэрэ, олохтоохтор, Алексей Неустроев ийэтинэн аймахтара Октябрина Алексеевна Новгородова дьиэ кэргэнинээн үөрүү көтөллөөх уруйдаан-айхаллаан көрүстүлэр. Алексей биир дойдулаахтарыгар, кэнчээри ыччакка үтүө тыллары анаата. Олохтоох дьаһалтаҕа итии чэйдээх, минньигэс алаадьылаах остуол тула олорон, дьоруойдуун иһирэх кэпсэтиилээх, истиҥ көрсүһүү буолла. Уус Алдан улууһун дьаһалтата арыаллаах Алексей ыгым графигынан сылдьарын эттилэр, салгыы Дьокуускайга көрсүһүү.
Нам улууһун баһылыга Юрий Слепцов, «Хатыҥ Арыы нэһилиэк» МТ баһылыга Иван Ноговицын аатыттан Хатыҥ Арыы нэһилиэгэр сир учаастагар сертификат, истиҥ тыллардаах эҕэрдэ сурук, нэһилиэк историятын сырдатар киниигэ, сэмэй бэлэхтэрин туттардылар.
Булугас өйдөх, түргэн толкуйдаах, мындыр саха уолбут, дойдутун сылаас тыына угуттаан, чэгиэн сылдьарыгар, чэбдик ыра санаа арыаллыырыгар, дойдугар этэҥҥэ кыайыы көтөллөөх эргиллэригэр баҕарабыт. Урааҥхайдыы уруйдуубут, сахалыы айхаллыыбыт!
Надежда Сивцева, Аппааны