Сыл бүтүүтэ спорт бары оскуолалара, тэрилтэлэрэ, көрүҥнэр федерациялара сылы түмүктүүр күрэхтэһиилэри оҥороллор. Ол курдук, бу күннэргэ Нам дуобатчыт оҕолоро “Лидер” спорт киин бирииһигэр буолбут улуустааҕы “Олимпик” спорт оскуола дуобакка тэрийбит Саҥа дьыллааҕы аһаҕас күрэхтэһиитигэр мустубуттара.
Намнааҕы общественник дьиэтигэр 2-с Хомустаахтан, Граф Биэрэгиттэн, “Сулусчаан” уһуйаантан, улуустааҕы “Олимпик” спорт оскуолаттан, Ньургун Тимофеев аатынан өрөспүүбүлүкэтээҕи Олимпийскай эрэл спорт оскуолаттан 43 иитиллээччи кыттыыны ылбыт. Бэлиэтээн эттэххэ, 2- Хомустаахха саҥа ананан үлэлээн эрэ тренер Венера Спиридонова 7 оҕону дуобат күрэхтэһиитигэр аҕалбыт.
“Күрэхтэһиибитигэр Ленскэй нэһилиэк олохтоох дьаһалтатын иһинэн үлэлиир “Лидер” спорт киин куруук күүс-көмө буолар. Куруутун илиилэрин утары уунан көмөлөһөр чугас дьоммор киин салайааччыта Иван Яковлевка, Анатолий Матвеевка барҕа махталбын биллэриэхпин баҕарабын.
Саҥа дьыллааҕы дуобат күрэхтэһиитин өйөөн, оҕолорун кытыннарбыт “Сулусчаан” уһуйаан иитээччитэ Марианна Борисовнаҕа, 2-с Хомустаах саҥа тренера Венера Спартаковнаҕа махтанабын», — диир тренер Надежда Протопопова
Кыра саастаах бөлөх оҕолоругар:
1 миэстэ – Устинова Дайана, Намнааҕы 1-кы нүөмэрдээх оскуолатын 1 кылааһын үөрэнээччитэ, “Олимпик” спорт оскуола;
2 миэстэ – Дьяконов Арчылаан, НСОШ 1 кыл. үөрэнээччитэ, РСШОР;
3 миэстэ – Неустроев Артур, ННОШ.
Орто саастаах бөлөх оҕолоругар:
1 миэстэ – Сивцев Ян, Граф Биэрэгэ, РСШОР;
2 миэстэ – Мандарова Айнаара, Намнааҕы 2-с нүөмэрдээх оскуола 3 кыл. үөрэнээччитэ, “Олимпик”;
3 миэстэ – Протопопова Камила, ННОШ, 2 кылаас.
Разрядниктар ортолоругар:
1 миэстэ – Дьяконов Дьулустан, НСОШ-1 3 кыл. үөрэнээччитэ, РСШОР;
2 миэстэ – Олесов Саян, улуустааҕы гимназия 5 кыл. үөрэнээччитэ, “Олимпик”;
3 миэстэ – Гаврильева Василиса, ННОШ 4 кыл. үөрэнээччитэ, “Олимпик”.
Харысхан Попов