Аппааны бөһүөлэгин «Арчы» общественниктар балаҕаннарыгар энтузиаст спортсмен Егор Афанасьевич Эверстов кэриэһигэр дуобакка күрэх буолан ааста.
Сэтинньи 25-26 күннэригэр ыытыллыбыт күрэх «Хатыҥ Арыы нэһилиэгэ» МТ, Нам улууһун дуобат федерацията уонна Хатыҥ Арыы нэһилиэгин спорт уонна ыччат отделын тэрийиитинэн ыытылынна. Күрэхтэһии швейцарскай системанан барда, уопсайа 9 туурдаах, 1 туур 30-туу мүнүүтэ буолла.
Күрэх үс хайысханан ыытылынна. Ол курдук, 1 бөлөххө – РФ, КМС спорт маастардара, 2 бөлөххө – маассабай разрядтаахтар, 3 бөлөххө дьахталлар кытыннылар. Икки кун устата уопсайа отуттан тахса киһи кытынна. Күрэх кылаабынай судуьуйатынан Анатолий Матвеев, секретарынан Иван Эверстов үлэлээтилэр.
Түмүк маннык буолла, разрядниктарга: 1 м. — Ион Васильев (Модут), 2 м.- Анатолий Эверстов (Бөтүҥ), 3 м. — Дьулустан Дьяконов (Намнааҕы 1 №-дээх оскуола 2 «а» кылааһын үөрэнээччитэ, тренер Прокопьев Василий). Эдэр дуобатчыт Дьулустан 2-с спортразрядтаах, уопуттаах үс киһини ситиһиилээхтик кыайда, теорията олох үчүгэй диэн судейство хайҕабылын ылла, итиэннэ Иван Ноговицын, Егор Бурнашев туруорбут “Перспективному молодому шашисту” анал бирииһи тутта.
Дьахталларга: 1 м. — Розалия Егорова (Нам сэл.), 2 м. — Сардаана Григорьева (Нам сэл.), 3 м. — Светлана Емельянова (Нам сэл.). КМС-тарга: 1 м. — Иннокентий Лаврентьев (1 Хомустах нэһилиэгэ), 2 м. — Валера Эверстов (Хатыҥ Арыы нэһилиэгэ), 3 м. – Иван Эверстов (Хатыҥ Арыы нэһилиэгэ).
Кэлэр сыл Хатыҥ Арыы нэһилиэгэр «Спорт уонна Чөл олох» сылынан биллэриллэринэн, спорт бары көрүҥнэригэр, ол иһигэр дуобакка, саахымакка, улахан болҕомто ууруллуоҕа.
Надежда Сивцева