Саҥа дьылы көрсө Аппааны бөһүөлэгин олохтоохторо Татьяна Замятина, Алена Оконешникова, Миролюбовь Сивцева, Луиза Егорова, Анастасия Тимофеева Нам улууһун олохтоохторугар умнуллубат түгэни бэлэхтээтилэр.
Луиза Егорова иһитиннэрбитинэн, 2022 сыл тохсунньу 2 күнүгэр дьүөгэлэрэ Татьяна Андреевна Фрунзе нэһилиэгэр олорор аймаҕа улаханнык ыалдьан, суһаллык эмп көрдөөн, үс кыыс буолан айаннаабыттар. Онтон төттөрү кэлэн иһэннэр хас нэһилиэк аайы саҥа дьылы көрсө симэммит харыйалары көрбүттэр-истибиттэр. 2023 сылга дьүөгэ кыргыттар сөбүлэһэннэр, номнуо улуус 15 нэһилиэгин саҥа дьыллааҕы харыйаларын көрбүттэр.
Быйыл Үөдэйтэн саҕалаан хоту нэһилиэктэргэ тиийэ сылдьыбыттар. Сыллата нэһилиэктэр харыйалара тупсан, киэркэйэн иһэллэрин бэлиэтииллэр. Холобура, Бөтүҥ, Көбөкөн, Хатырык харыйалара тупсан, саҥа дьыллааҕы бэйэ оҥоһуктарынан киэркэйбитин, уота-күөһэ элбээбитин этэллэр.
Дьүөгэлиилэр харыйа анныгар саҥа дьыллааҕы сэмэй бэлэхтэрин хаалларбыттар, харыйа лабаатыгар минньигэс кэмпиэттэри ыйаабыттар. Куйаар ситимин нөҥүө кыргыттар бачыымнарын истиһэннэр нэһилиэк олохтоохторо, оҕолор саҥа дьыллааҕы бэлэхтэри тутан үөрбүттэр.
Дьикти түгэни бэлэхтиир кыргыттарга баҕарабыт бу үүммүт 2025 сыл бары кэрэни-үтүөнү, үлэҕитигэр ситиһиини, дьиэ кэргэттэргитигэр дьолу-саргыны аҕаллын!
Надежда Сивцева