Бүгүн, ыам ыйын 7 күнүгэр, киэн туттар биир дойдулаахпыт, биллиилээх государственнай уонна политическай деятель, «Бочуот Знага» уордьан кавалера, «Норуоттар Доҕордоһуулара» уордьанын хаһаайына, САССР норуотун хаһаайыстыбатын үтүөлээх үлэһитэ, САССР Үрдүкү сэбиэтин 7-с, 8-с, 9-с, 10-с уонна 11-с ыҥырыылаах депутата, Дьокуускай куорат уонна Нам оройуонун Бочуоттаах гражданина Николай Охлопков төрөөбүтэ 95 сыла буолла.
Бу күн чэрчитинэн кини аата иҥэриллибит Нам улуустааҕы гимназиятыгар үгүс тэрээһиннэри ыыттылар. Николай Семенович үбүлүөйдээх 95 сылыгар оруобуна гимназияҕа кини аата иҥэриллибитэ 25 сыла буолар.
Бүгүн Н.С. Охлопков аатынан Нам улуустааҕы гимназиятыгар баар мемориальнай өйдөбүнньүгэр сибэкки дьөрбөтүн уурдулар. Үөрүүлээх уонна долгутуулаах түгэҥҥэ «Нам улууһа» МТ баһылыгын э.т. Анатолий Павлов, улуус депутаттарын сэбиэтин председателэ Алексей Винокуров, СӨ Ил Түмэн государственнай мунньаҕын тыа сиригэр уонна аграрнай политикаҕа сис комитетын председателэ Александр Атласов, СӨ олохтоох бэйэни салайыныыга департаменын салайааччыта Иван Попов, СӨ норуотун хаһаайыстыбатын үтүөлээх үлэһитэ, СӨ Бочуоттаах олохтооҕо, СӨ бэтэрээннэрин сэбиэтин чилиэнэ Люлия Григорьева, СӨ норуотун хаһаайыстыбатын үтүөлээх үлэһитэ, СӨ государственнай сулууспатын туйгуна, Нам, Бүлүү, Томпо улуустарын Бочуоттаах олохтооҕо Климент Корякин, СӨ государственнай сулууспатын бэтэрээнэ, РСФСР үтүөлээх экономиһа Зинаида Федорова, 1965-1985 сс. САССР министрдэрин сэбиэтин секретара, государственнай сулууспа бэтэрээнэ Изабелла Яковлева, РФ үтүөлээх учуутала, РФ норуотун үөрэҕириитин туйгуна, Нам улууһун Ытык киһитэ, Н.С. Охлопков аатынан Нам улуустааҕы гимназия 1994-2015 сс. директора Валерий Попов, Николай Семенович кыргыттара РФ суруналыыстарын сойууһун чилиэнэ, СӨ телевидениетын уонна радиотын туйгуна Марианна Охлопкова, РФ норуотун үөрэҕириитин туйгуна, СӨ үөрэҕириитин бочуоттаах үлэһитэ Екатерина Охлопкова, кинилэр оҕолоро, сиэннэрэ, «Таастаах нэһилиэгэ» МТ баһылыгын э.т. Сергей Аргунов, Таастаах дьаһалтатын үлэһиттэрэ, оскуола коллектива, үөрэнээччилэрэ кыттыыны ыллылар.
Темир Охлопков, Н.С. Охлопков улахан сиэнэ: «Эһэм, Николай Семенович, ирдэбиллээх, олус болҕомтолоох, үлэтигэр бэриниилээх этэ. Дьиэ кэргэнигэр, аймахтарыгар, коллегаларыгар, доҕотторугар тэрийээччи, көҕүлээччи кини буолара.
Барыбытын түмэ тардан даачабытыгар субуотунньукка бырааһынньыкка барар курдук барааччыбыт. Кыра эрдэхпиттэн үлэҕэ сыһыарбыта, сэттэ сааспыттан эбэм дойдутугар Түбэҕэ ыытара. Нам улууһугар кини аатын үйэтитии үлэтин ыыталларыттан үөрэбит уонна махталбытын тиэрдэбит. Гимназия коллектива 5 сыл буола-буола үбүлүөйдээх тэрээһини ыытарыттан астынабыт», — диэн санаатын үллэһиннэ.
М.К. Аммосов аатынан культура уонна духуобунай сайдыы дыбарыаһыгар Н.С. Охлопков төрөөбүтэ 95 сылыгар аналлаах Нам улууһун общественноһын үөрүүлээх мунньаҕа Николай Семенович олоҕун, үлэтин сырдатар документальнай киинэ көрдөрүүтүнэн саҕаланна. Мунньахха кини үлэлээн ааспыт таһаарыылаах сылларын ахта-санаан аастылар. Дьон көрүүтүгэр-истиитигэр турбут быыстапка кыттааччылар болҕомтотун тарта.
Н.С. Охлопков аатынан Нам улуустааҕы гимназиятын, М.Е. Охлопкова аатынан Түбэ орто оскуолатын, М.В. Петрова аатынан Таастаах орто үөрэхтээһин оскуолатын үөрэнээччилэрэ, учууталлара уонна төрөппүттэрэ кыттыылаах «Саҥа саҕахтар» диэн кэнсиэр буолла.
Семен Аргунов